(NLTimes)—Investigadonan na Nijmegen ta optimista cu e extracto di planta colchicine, un remedi antiguo pa pia, tambe por yuda hende osteoartritis. Usuarionan di colchicine cu a participa den estudio a mustra un reduccion di 30% den e necesidad pa operacion pa reemplasa rudia y heup, y e meditacion ta barata, sigur y facil pa uza, segun cientificonan di Radboudumc, e centro medico universitario na Nijmegen, y Sint Maartenskliniek.
Osteoartritis ta un forma comun di artritis cu ta afecta 1.5 miyon hende na Hulanda. Esnan cu ta sufri di artritis tin dolor pasobra e cartilago di articulacion ta gasta. Hendenan cu tin artritis ta depende awor di remedi pa dolor,y algun articulacion afecta por wordo reemplasa pa medio di operacion.
Colchicine a wordo usa prome pa trata inflamacion causa pa e malesa di “gout” al menos desde e prome siglo, y algun investigado ta kere cu esaki a wordo usa prome cu 1500 A.C. tambe. Varios aña pasa, e profesor di cardiologia di Radboudumc, Jan Hein Cornel, y su coleganan a bin cu e idea cu e remedi por traha contra enfermedadnan cardiovascular caminda inflamacion tambe ta hunga un papel.
“Inflamacion ta hunga un papel importante den e condicionnan ey tambe.Y nos tabatin rason: Nos estudio a mustra cu colchicine a reduci e riesgo di un atake di curason, angioplastia, bypass of stroki cu 30%,” Cornel a bisa. A conduci e estudio ey den un colaboracion cu Calin Popa, un reumatologo na Sint Maartenskliniek, cu a hipotetisa cu e medicamento tambe por trata hendenan cu osteoartritis.
Nan a analisa e data existente den un estudio y a descubri e conexion entre uzo di colchicine y alivio pa pashent cu osteoartritis. Nan a publica e resultadonan diamars den e revista Annals of Internal Medicine, Radboudumc a anuncia.
“Den e grupo trata cu colchicine, e cantidad di pashent cu a ricibi un rudia of heup nobo tabata mas cu 30% abou compara cu e grupo placebo. Pasobra cu esaki ta un remedi antiguo, nos sa cu e ta sigur,” Michelle Heijman a bisa, investigado na e Sint Marrtenskliniek cu a yuda den e estudio.
Como remedi, colchicine a prueba di ta sigur pa milenio, y dokter por prescribi esaki caba pa esnan cu e malesa di gout. Si esaki ser aproba como un tratamento pa osteoartritis, esaki lo rekeri cu pashentnan lo mester tuma un pildo so pa dia, na un costo barata pa aña, investigadonan a splica. Popa a bisa cu e ta kere cu esaki ta mehora calidad di bida mientras cu e ta retrasa of elimina e necesidad pa operacion, y tambe reduci costo di cuido medico.
Mirando cu e prome estudio tabata diseña pa analisa e efecto di e droga den pashentnan cu problema cardiovascular, mester di un otro estudio pa confirma e resultadonan pa pashent cu osteoartritis. Popa y Cornel tin e intencion pa continua cu nan trabou.
“Si nos por confirma cu colchicine en berdad ta traha, esaki lo un hopi bon noticia,” Pope a enfatisa.
