Apenas dos rhinoceronte blanco di nort ta existi den mundo: tur dos ta femenino y ningun di nan por sali na estado. Pero cientificonan no a bandona speransa di salba e especie for di extincion.
Nan a logra aña pasa crea embryonan hibrido uzando sperma gevries di rhinoceronte blanco y webonan di un rhinoceronte blanco di sur, un sub- especie cercanamente relaciona.
Awo nan ta trahando riba con lo implanta e embryonan den un mama substituto pa carga e embaraso, y unabes nan logra esey, nan por crea embryonan di rhinoceronte blanco di nort di pura rasa, cu lo wordo carga pa un rhinoceronte blanco di sur.
Como parti di e trabou ey, diaranson, un ekipo lidera pa Thomas Hildebrandt di e instituto Leibniz pa investigacion di zoologia y bida salvahe na Berlin, a cosecha cellnan di webo for di un rhinoceronte blanco di nort femenino, Hope, di 17 aña di edad, na un parke na e ciudad sur di Polonia, Chorzow.
Recientemente, nan a haci mescos cu un seleccion di rhinoceronte blanco di sur como 18 biaha den zoologico na Europa.
Cu e tamaño di un rhinoceronte y su peso di como dos ton, tabata un reto pa e cientificonan busca un manera di cosecha e webonan sin causa daño na e bestia.
Ya cu e ovarionan ta como dos meter paden, nan a introduci un instrumento cu nan a crea pa e proposito aki, conteniendo un camara ultrasonido cu un hangua, na e ano di e bestia y den e tehido ovario.
“Ta un tiki manera ciencia di raket, pasobra no tin un ehempel pa nos sigui, pasobra nos ta e prome den e campo aki pa desaroya tur cos for di cuminsamento”, Hildebrandt a bisa.
Ya cu e rhino nort femenino, un mama y un yiu yama Najin y Fatu, kende ta biba na Kenya, no por haya un yiu nan mes, e embryonan crea cu nan webo lo wordo implanta den un substituto rhinoceronte blanco di sur.
E proceso di implantacion ta locual awo e cientificonan ta purbando di perfecciona. Unicamente ora nan por master esaki nan por tuma e riesgo di uza e cellnan di webo di e ultimo dos rhinoceronte sobreviviente y e sperma preserva pa produci un rhinoceronte blanco di nort ‘puro’, cu lo wordo pari pa un substituto sureño. Nan ta spera di logra esaki den menos cu tres aña.
