Pa prome biaha cientificonan a logra elimina e virus di HIV, e virus responsabel pa AIDS, for di e DNA di bestianan bibo. E estudio ta un stap critico pa desaroya un posibel cura pa e infeccion HIV humano.
Bou un capa cooperativo, cientificonan na Lewis Katz School of Medicine na Temple University (Philadelphia) hunto cu University of Nebraska Medical Center a elimina pa prome biaha DNA di HIV-1 di bestianan bibo. E estudio a aparece pa prome biaha riba 2 di juli den e journal Nature Communications, marcando di e manera aki un stap critico pa yega na e desaroyo di un posibel cura pa e infeccion di HIV humano.
E estudio ta mustra cu e tratamento pa supresion di e HIV, hunto cu terapia di edicion di DNA, conhuntamente ta elimina HIV di celnan y organonan di bestianan infecta cu e virus. E logro aki no lo tabata posibel sin cooperacion mutuo entre virologonan, inmunologonan, biologonan molecular y expertonan farmaceutico, segun un di e cientificonan.
Tratamento di e virus HIV actualmente ta enfoca riba e uzo di terapia antiretroviral (ART). Supresion di HIV ta loke e ART ta logra, mirando cu esaki no ta elimina e virus di e persona su sistema. Pa tal rason, ART no ta un cura pa HIV y ta rekeri uzo durante e pashent su bida henter. Si un pashent stop di tuma su tratamento, e virus ta ‘rebound’, avansando e desaroyo di AIDS di un manera mas acelera. E rebound aki ta atribui na e virus su habilidad di integra su secuencia di DNA den celnan di e sistema immunologico, unda e ta keda pasivo y fuera di alcance di droganan antiretroviral.
