Plastic reciclabel no ta asina reciclabel manera bo ta pensa, cu productonan barata, por ehempel, un boter ta comberti den hilo pa tapijt. Pero un ekipo di cientificonan di Laboratorio di Berkeley lo por a cambia esey cu un descubrimento cu nan ta describi manera e ‘Holy Grail’, un plastic cu por recicla den un dozijn di materialnan diferente, un biaha tras di otro. Mescos cu un Lego, e PDK por wordo desbarata den su partinan constituyente na nivel molecular y despues bolbe arma cu un forma, textura y color diferente; un y otro biaha. Esaki por ta e descubrimento cu ta cambia mundo.
Te hasta e plastic di mas reciclabel, e PET ta recicla djis na 20% a 30%, mientras cu e resto ta djis kima of hiba dump, caminda e material aki rico den carbon, ta tarda siglonan pa deshaci. “Mayoria plastic nunca a wordo traha pa recicla,” asina Peter Christensen, cientifico di e instituto y autor principal di e estudio, a bisa. “Pero nos a descubri un manera nobo di arma plastic cu ta tene cuenta cu reciclahe for di e perspectiva molecular.”
E material nobo, yama poly(diketoenamine), o PDK, a keda registra den e revista Nature Chemistry. E blokinan di construccionnan kimico (monómero) di plastic PDK lo por recupera y libra di cualkier tipo di aditivo dor di hinca e material den un likido hopi acido.
