Mientras e coronavirus ta continua infectando hende na Reino Uni y probablemente lo resulta den e pio brote di Europa, gobierno a ricibi critica di cientificos, kende ta bisa cu a neglisha lo fundamental di control di epidemia.
Centenares di expertonan di brote a cuestiona e respuesta di Reino Uni na e pandemia, ridiculisando e declaracion di gobierno cu ta ‘siguiendo e ciencia’.
“Tabatin un sentido di fatalismo y mi ta kere cu gobierno a descarta opcionnan di contencion cu no mester a descarta”, segun Martin McKee, profesor di salubridad publico Europeo na London School of Hygiene and Tropical Medicine. “Y awo nos mester deal cu e consecuencianan.”
E consecuencianan ta inclui un cantidad di morto cu awo a alcansa 28,446. Esey ta tiki menos cu Italia, e pais mas afecta di Europa cu 28,884 morto confirma. Pa varios siman, Reino Uni tabata enfoca riba test amplio, cu meta di conduci 100mil test di COVID-19 pa dia pa fin di april. A logra e meta, pero a faya di tene e cantidad na e nivel aki.
Expertonan di epidemia a adverti cu e enfoke abrumador di Reino Uni riba test a ignora un elemento igualmente esencial di control di brote: track y isolacion di contactonan di caso.
Esaki ta sigui un respuesta ya retrasa na e pandemia. Mientras WHO a declara e coronavirus un emergencia global dia 30 di januari, tabata te na dia 5 di maart cu Reino Uni a haci e malesa ‘notificabel’ rekeriendo dokternan pa reporta.
Departamento di Salud Britanico recientemente a bisa cu lo train 18mil persona pa track contacto di caso pa monitor transmision di e virus, y tabatin meta pa pone nan den funcion pa mita di mei. Pero no a revela detaye di con e programa lo traha. Un falta di precision asina, expertonan ta preocupa, por conduci na un segundo ola di brote devastador.
David McCoy, profesor di salubridad publico global na Queen Mary University of London a bisa cu e respuesta di pandemia di Reino Uni tabata demasiado influencia pa modelo matematico na luga di intervencionnan estableci pa brote. E problema ta cu nan ta djis produci scenario basa riba suposicion cu por ta corecto of fout, y no bisa kico mester haci, el a bisa. A implementa lockdown na Reino Uni e dia despues cu modelonan a sugeri cu por tin 250mil morto den e ‘best case scenario’.
Departamento di Salud a rechasa preocupacionnan tocante e validez di su strategia, bisando cu ta ‘guia na tur momento pa e miho conseho cientifico’.
Pero Annelies Wilder-Smith, experto di salubridad publico na London School of Hygiene and Tropical Medicine, a bisa cu ta preocupante cu Reino Uni no tin plan pa retira contacto di casonan for di comunidad den facilidadnan special, similar na China y Singapore. “Si bo no isola e contactonan cu por tin e malesa, nan lo djis keda cas y infecta nan amigo y famia”, el a bisa.
Mayoria di pais occidental a nenga di considera politicanan di intervencion asina, y algun experto ta bisa cu e rechaso aki ta dunando impulso na transmision di virus.
