Matanan fluorescente por no ta parti di ciencia ficcion mas, ya cu cientificonan a haya un manera pa crea mata cu ta briya den scuridad, cu ta saca y mantene un briyo berde misterioso durante henter e ciclo di nan bida.

Bioluminiscencia – e emision di luz di un organismo – ta presente den un variedad amplio di animal y microorganismo, incluyendo algun fungi, insecto, pisca, animal marino invertebra, y bacteria. Algun di e ehempelnan mas famoso di e fenomeno ta inclui fireflies, of e olanan blauw electrico den lama tropical.

Despues di descubri cu e bioluminiscencia haya den algun paddenstoel tabata metabolicamente similar na algun proceso natural haya den mata, cientificonan tabata capaz di transferi secuencianan di DNA den mata di tabaco, causando nan pa duna un luz berde briyante. Investigadonan a haya cu e luz aki a dura henter e ciclo di bida di e mata, for di prome brote te cu madurez. Paddenstoel

“Nos ta mustra cu por transferi cuatro genes di e paddenstoel briyante aki den e mata – y programa nan den nan metabolismo – pa asina e matanan cuminsa briya den scuridad”, segun Karen Sarkisyan, un di e autornan lider di un estudio publica den journal Nature Biotechnology a bisa CNN.

A diferencia di otro tecnologia luminisciente, el a bisa CNN, e descubrimento reciente di e team lo permiti matanan pa briya den scuridad sin tin mester di kimiconan externo.

Por usa e tecnologia pa un variedad di proposito, incluyendo creacion di mata y flor decorativo briyante, segun e investigadonan. Tambe lo por usa e luz di e matanan pa studia nan interior – investigadonan a nota patronchi y ola di luz den e organismonan, revelando comportamento di mata cu no ta mira usualmente.

Mientras bioluminiscencia ta tuma luga den mundo natural, Sarkisyan a bisa CNN cu matanan no a exhibi e fenomeno anteriormente. “Nos ta ignora matanan, nos no ta aprecia con compleho of con bibo nan ta. Nan ta manda un cantidad di diferente señal, nan ta integra y haci hopi decision di desaroyo, y nos no ta aprecia nan realmente”, el a bisa. “Dunando nan un briyo, di un forma ta construi un relacion nobo cu e matanan, y bo por aprecia hopi mas facil con bibo nan ta.”

Den investigacion di colaboracion, cientificonan a bisa cu a logra crea matanan cu ta briya ‘dies biaha mas’ sin daña e blachinan. Nan ta bisa cu otro matanan – incluyendo petunia, rosa y periwinkle – por wordo adapta pa pone nan briya, y cu den futuro, por hasta adapta matanan pa cambia nan color, briyo of hasta responde na nan ambiente.