Cambio climatico ta un di e retonan mas grandi cu humanidad a enfrenta te awo.
Con nos lo logra mitiga kentamento global y su consecuencianan devastado ainda ta un ‘hot issue’ entre politiconan y cientificonan – y te awo, e resultado di e debate aki no a duna fruto.
Sinembargo, investigadonan na Harvard a pensa un solucion cu ta parce demasiado bon pa ta cierto.
Conhunto cu investigadonan di MIT y Princeton, e grupo a sugeri baha velocidad di kentamento global door di reduci e cantidad di luz solar cu ta alcansa superficie di tera. E tecnologia yama ‘geoengineering’ of ‘geotecnica solar’.
Segun un estudio publica den Nature Climate Change, e investigadonan ta considerando kico lo pasa si nan introduci particulanan cu ta refleha luz solar den atmosfera terestre.
Lo mas importante pa nota ta cu e investigadonan no ta sugeriendo e metodo ta un solucion pa tendencianan creciente di kentamento global; e no ta diseña pa trece temperatura bek na nivelnan pre- industrial, ni ta adresa e raiz real di e problema – e cantidad di dioxido di carbono cu nos ta produci. De hecho, un dosis di ‘oscurecimento’ demasiado halto lo por empeora e problema.
Investigado postdoctoral na Harvard John A. Paulson School of Engineering and Applied Sciences, Peter Irvine, tabata autor lider di e estudio.
“E analogia no ta perfecto”, el a splica, “pero geoengineering solar ta un tiki manera un droga cu ta duna presion halto di sanger. Un sobredosis por ta malo, pero un dosis bon por reduci bo riesgo. Claro, ta miho pa no tin presion halto na prome luga, pero unabes bo tin e, hunto cu miho decisionnan, ta bal la pena considera tratamento cu lo disminui bo riesgo.”
E estudio ta sugeri cu e tecnologia aki por corta e velocidad na cual temperatura ta elevando cu mita, cual por tin beneficionan global sin exacerba problema na otro parti di mundo.
Hunto cu e medida, sinembargo, emision di dioxido di carbono mester wordo reduci rond mundo. Pa compronde miho cua region lo ta mas perhudica si combina e tecnologia di geoengineering cu reduccion di emision, e investigadonan a uza un modelo vanguardista di resolucion halto pa simula yobida extremo y horcan. Esaki ta e prome biaha cu un model asina a wordo uza pa mira den e posibel efectonan di geotecnica solar.
E investigadonan a studia extremonan di temperatura y precipitacion, disponibilidad di awa, y tambe a midi intensidad di tormenta tropical.
Mientras cu e ciencia rond di geoengineering ta mas cu mey siglo bieu, ta apenas recientemente – desde cu nos atencion a wordo poni riba cambio climatico – cu cientificonan a intensifica nan investigacion den e area.
Investigadonan na Harvard University a enfatisa, sinembargo, cu nos respuesta principal na cambio climatico mester ta corta emision di dioxido di carbono; geoengineering so no lo ta capaz di remedia e raiz di nos problema ambiental.
