(AP) – E caminda pa Lost Lake ta uno sin asfalt y sumamente halto, yena di buraco y piedranan skerpi. Un grupo di cientificonan y studiantenan tabata subi cu ayudo pa guianan. Pa esnan cu no por a cana e ruta, un drone a trece e lago den bista pa nan.
E trip a ser diseña pa ilustra e desafionan cu investigadornan cu descapacidad hopi biaha ta enfrenta y con e bareranan por ser combati.
“Djis paso bo no por hacie manera otro hende no kiermen cu bo no por,” Anita Marshall, un geologo di University of Florida a bisa. E grupo a inclui cientificonan cu problemanan di bista, horea y mobilidad.
E organisacion di Marshall a organisa e trip na e lago cerca di San Andreas Fault, pafo di San Bernadino. Su grupo – International Association for Geoscience Diversity – y otronan ta trahando pa mehora e acceso na trabao di laboratorio y riba caya pa esnan cu descapacidad sinti bon bini y keda.
Taormina Lepore, un palentologo di Michigan University cu a participa, a bisa cu e cientificonan tin e habito di duna balor na un solo manera tradicional di haci un trabao. Na Lost Lake, tur hende por a mira – hasta si nan por a yega fisicamente. “E ta trata empatia, mesun hopi cu ciencia,” Lepore a comenta, ken tambe ta investiga ciencia den educacion.
Haci laboratorionan mas accesibel
Personanan cu descapacidad ta 3 porciento di e forsa laboral den matematica, ingenieria, tecnologia y ciencia segun data di 2021 di National Science Foundation.
Cientificonan cu descapacidad ta bisa cu esaki ta parcialmente pa motibo cu laboratorionan, klasnan y sitionan di trabao no ta diseña pa acomoda nan. Studiantenan y facultad te ainda ta bisa cu nan no por traha den un laboratorio of conduci nan investigacion di manera safe, segun Mark Leddy, ken anteriormente a maneha subsidio relaciona cu descapacidad pa National Science Foundation a comparti.
Americans with Disabilities Act, aproba den 1990, ta pone un minimo di regulacionnan pa edificionan nobo y laboratorionan, incluyendo rampa y camindanan accesibel pa rolstoel.
Sinembargo modifica e laboratorionan mas bieu ta un proceso largo y complica.
Alyssa Paparella ta trahando riba su doctorado den biologia na Baylor College of Medicina y a funda un comunidad online pa cientificonan cu descapacidad. El a bisa cu un edificio di ciencia na un di su ex scolnan no tabatin boton automatico pa habri portanan. “Kico esey ta bisa di ken bo kier pa traha den e laboratorionan?” el a remarca. “Esey ta e porta principal cu nan no por nisikiera usa pa drenta.”
Leddy a bisa cu investigadornan cu descapacidad no por ser balora a causa di nan experiencianan den bida. Constantemente mester bin cu ideanan creativo pa por logra combati y surpasa e bareranan den nan bida, un habilidad di soluciona problema cu ta indispensabel den un laboratorio.
“Si nan no ta sinti bon bini, si nan no tin acceso, con nan por contribui e talento aki?” Leddy a declara.
Na Purdue University na Indiana, profesor di ingenieria Brad Duerstock a yuda diseña un laboratorio biomedico añanan atras cu sosten di e scol y un instituto nacional di salud su subsidio, kitando cabinet for di bao di e sink y otro partinan pa asina e rolstoel por facilmente haci uso di esaki.
E gasto di haci un laboratorio mas accesibel ta varia segun con extenso e cambionan mester ta, segun Duerstock. Algun scol ta aloca fondo pa e mehoracionnan y organisacionnan di ciencia por ofrece subsidio pa esaki.
Accesibilidad riba caya
Riba e trip di California, e grupo a explora e lago cu a surgi na San Andreas Fault, unda e choke di dos ‘aardplatten por causa teremoto.
E grupo a inclui fanaticonan di piedranan den tur diferente etapa di e carera. Un cantidad di nan tabata studiante. Otronan tabata profesor, emociona pa explora e area den un grupo unda nan por confia cu lo cuida di otro.
Central Connecticut State University su profesor Jennifer Piatek, ken ta usa rolstoel, a mira e lago via imagennan di drone y a usa un lens pa examina e piedranan cu otro participantenan tabata trece p’e.
El a bisa cu tabata algo bunita pa forma parti di un comunidad cu a anticipa su necesidadnan. Por ehempel, nan bus a parkeer na un area mas plat pa asina ta mas facil pa e por baha. Bo por siña di imagennan y mapanan, “pero bo tin cu realmente ta den e espacio pa bo por sa mas,” Piatek a bisa, ken ta studia geologia di planetanan.
Lepore, un persona cu tin poco vision, a scan e piedranan usando un aplicacion di inteligencia artificial cu tabata describi e colo y forma di e piedra cu bos halto.
“Naturalesa no ta automaticamente accesibel,” el a comparti. “Naturalesa n otin rampa y e tipo di cosnan cu nos ta desea pa e tin. Pero tin maneranan pa traha cu esaki y maneranan cu nos como geocientifico por haci cosnan berdaderamente accesibel.”
Bushra Hussaini ta usa tip di e tripnan aki pa brinda sosten na stragiaire of boluntarionan incapacita na New York American Museum of Natural History unda e ta traha. El a bisa cu e comunidad di geologonan aki ta loke ta mantene ta keda bin back. “Nos ta siña di otro y nos ta yuda otro,” el a splica.
Prome cu el a sali, Marshall a urgi e participantenan pa duna un man of un schouder pa depende di dje si ta necesario. Su persona y otronan di e organisacion tin tempo ta bay riba trip tur aña como un parti di Geological Society of America su reunion anual.
Como studiante den su doctorado, Marshall tabata bay trip solamente pa warda den e van, frustra, pa motibo cu e organisadornan no a pensa con pa acomoda su descapacidadnan. E kier pa cosnan ta diferente pa e siguiente generacion di cientifico.
“Henter punto di e tripnan aki ta pa planta e simia,” Marshall a expresa, agregando cu “tin otro maneranan pa cana y avansa.”
