Cientificonan Chines ta implanta genes di cerebro humano den macaco

Cientificonan Chines a implanta genes di cerebro humano den macaco, tumando un stap mas den direccion di locual a wordo describi como e ‘pesadiya etico’ di e ramo di edicion genetico.

Den un estudio publica luna pasa den e National Science Review di Beijing, cual ta e journal di e Academia di Ciencia patrocina pa estado Chines, cientificonan a inserta e gen humano, MCPH1, cual ta relaciona na desaroyo celebral, den 11 embryo di macaco mediante un virus, cu a hiba e gen den e cerebro di e macaconan.

Di e 11 macaco rhesus macaque cu a uza den e experimento, seis a muri. Experimentonan a wordo conduci riba e cinco restante.

“E uzo di macaco transgenico pa studia gen humano relaciona cu evolucion celebral ta un caminda hopi riesgoso pa cana”, segun James Sikela, un geneticista kende ta traha cu primate na e University of Colorado, a bisa MIT Technology Review. “Ta preocupante cu e campo ta bayendo e caminda aki di e forma aki.”

Segun e ekipo cientifico na China, e experimento tabata un intento pa compronde e proceso evolucionario cu a hiba na inteligencia humano. E investigadonan ta kere cu e gen MCPH1 por duna parti di e contesta.

E cientificonan a conduci un serie di test riba e macaco, incluyendo MRI scan y test di memoria, cual a mustra cu e macaconan tabatin miho memoria a corto plaso y un reaccion mas lihe cu e grupo di control. Nan cerebro tambe a dura mas largo pa desaroya, similar na locual ta pasa cu humano.

Maske e team Chines ta bisa cu nan hallazgo ta significante, otro cientificonan ta keda altamente skeptico.

Martin Styner, un cientifico di computer na University of North Carolina, kende ta lista como co-autor di e studio, a bisa MIT Technology Review cu e tabata considerando kita su nomber for di e publicacion. E rol di Styner tabata limita na siña e studiantenan Chines con pa uza data di MRI pa compronde e volumen di e cerebro, el a bisa.

“Ora nos experimenta, nos mester compronde bon kico nos ta purbando di siña, pa yuda sociedad, y esaki no ta e caso”, el a bisa. “Nan ta purbando di compronde desaroyo celebral. Y mi no ta kere nan ta yegando na esey.”