(BBC) – Cientificonan ta kere cu nan a descubri con aspirin, e medicina barata pa dolor, por stop e diseminacion di cancer.

Den un experimento cu animal, e ekipo a demostra cu e remedi a fortalece e habilidad di sistema inmunologico pa lucha contra e cancer

E ekipo di Universidad di Cambridge a bisa cu e descubrimento ta un sorpresa cu lo por yuda futuro pacient di cancer pa medio di e remedi, pero no ta recomenda pa hende tuma e pildernan sin consulta un doctor. Aspirin regular tin su riesgo.

Datonan di mas cu un decada pasa a mustra cu hende cu ya caba tabata bebe un aspirin tur dia, tabatin mas probabilidad di sobrevivi si nan a ser diagnostica cu cancer.

Pero con e ta traha?

Cancer ta vulnerabel ora un solo cel keda separa di e tumor original y ta purba di plama na otro parti di e curpa, un proceso cu ta yama metastasis, cu ta causa mayoria di e fayecimento di cancer.

Nos sistema immuun tin un tipo di cel blanco, cu yama T-cells, cu por lucha contra e cancer cu ta plama. Sinembargo, e plateletnan, cu normalmente ta para sanger, ta blokea e T-cells, y ta haci’e mas dificil pa nan destrui e cancer.

Aspirin ta interveni cu e plateletnan, permitiendo e T-cells pa busca y destrui e cancer.

Profesor Rahul Roychoudhuri di University na Cambridge ta splica, “Aspirin por traha sorpresivamente pa potencia e sistema immuun pa reconoce y mata e cancer cu ta plama.”

E ta kere cu aspirin lo traha mihor pa cancernan cu a ser detecta trempan y por ser usa despues di tratamento manera un operacion pa yuda e sistema immuun pa busca cualkier cancer cu por a plama.

‘Momento Eureka’

E descubrimento, publica den e revista Nature, a pasa pa accident mientras e cientificonan no tabata investigando aspirin.

E ekipo na Cambridge tabata investigando con sistema inmunologico ta responde na cancer cu ta disemina.

Nan tabata usando raton geneticamente modifica y a descubri cu esnan cu no tin un set specifico di instruccion genetico tabata menos probabel pa keda contagia cu cancer metastatico.

Investigacion mas detaya a mustra con T-cells ta ser suprimi y esaki a cuminsa relaciona cu e manera con aspirin ta conoci pa funciona den e curpa.

Dr. Jie Yang, cu a realisa e investigacion, a bisa: “Tabata un momento Eureka”.

“Ta un descubrimento completamente inespera cu a manda nos na un caminda diferente di e investigacion cu nos tabata anticipa.”