(AP) — Cientifico a data skelet di un mucha antiguo cu a causa gran sorpresa ora cu el a ser descubri, pasobra e tin rasgo di tanto hende como Neandertal.
E restonan di e mucha a ser descubri 27 aña pasa den un refugio di piedra yama Lagar Velho den e centro di Portugal. Ora e mucha semehante humano a ser descubri, cientifico a nota cu un par di su atributonan, incluyendo proporcionnan di su curpa y su weso di kaki— ta parecido cu Neandertal. E investigador a sugeri cu e mucha tabata descendiente di un poblacion unda hende humano y Neandertal tabata mescla. E tabata un nocion radical e tempo ey, pero avancenan di genetica a prueba cu populacionnan asina a existi, y cu hende awe ainda ta carga DNA di Neandertal.
Pero pa descubri ki tempo exactamente e mucha a biba aden ta dificil. Raiznan chikito a crece den e wesonan y contaminacion, di mata of otro fuente, a haci’e imposibel pa cientificonan pa usa carbon dating tradicional pa midi e mucha su edad. En bes di esey, nan a data e carbon y wesonan di bestia cerca di e skelet entre 27,700 y 29,700 aña pasa.
Tecnicanan a yuda, y investigadornan a reporta diabierna den e journal Science Advances cu nan por a data e skelet midiendo un parti di un proteina cu ta principalmente den weso humano. Examinando un parti di un brasa, nan a revela cu e calculacion anterior tabata cerca: e skelet ta data entre 27,700 y 28,600 aña pasa.
Bethan Linscott, un autor di e estudio cu awor ta na Universidad di Miami, a nota cu e descubrimento inicial no tabata solamente un skelet, pero tambe tabata un tumba di un mucha. Ora di data e weso, no por a stop di pensa ken tabata stima e mucha aki, kico tabata pone e mucha hari y con nan mundo tabata mustra den su bida cortico di 4 aña.
E estudio di unda humano ta bini ta importante “pa mesun motibo cu nos ta warda potretnan di nos mayornan, y welo cu wela, ” e autor di estudio João Zilhão di Universidad di Lisboa a bisa. “E ta un manera di recorda.”
