Ciencia & Tecnologia lo Avansa Exponencialmente

Nos a toca varios tema di innovacion e añanan cu a pasa, fo’i 3D Printing di Cas pa Energia Solar pa Inteligencia Artificial, y diferente tema tussen in. Un aspecto di tur e tendencianan innovativo aki, ta cu nan ta progresando mas y mas rapido. Tambe nos tin cu tuma nota di tur sorto di innovacion cu ya caba ta existi y cu ta wordo implementa na diferente parti rond mundo.

Den e columna aki nos lo dedica nos mes na un resumen breve di tecnologianan innovativo, cu ya caba ta wordo implementa na diferente pais. Pero tambe pa lectornan realisa cu si nos wak kico ta posible awe caba, y no solamente extrapola e tendencia aki pero tambe tuma na cuenta cu dor di AI e tendencianan tecnologico lo bay mas y mas lihe.

Con nos sociedad lo por parce den ban bisa 10 of 20 aña?

Previsualisacion Hopi Duidelijk:

Ya caba nos tin diferente ehempelnan di innovacion cu a sali den noticia specialisa tecnologico den e delaster lunanan so.
Nos lo resumi esakinan:

CyBe Construction a 3D Print un cas na Curaçao di 100m2 pa $23.000,- US den menos di 7 dia. (fuente: CyBe Construction).

Prijs di energia solar na nivel utility grandi na India ya caba a yega na un nivel bou 7 cen florin per kWh. (fuente: PV Magazine).

Prijs di bateria pa auto y cas a cay mas cu 35% compara cu 2023 a yega $66/kWh na China. (fuente: RenewEconomy).

Inteligencia Artificial a yega un nivel cu ya caba ta miho cu mayoria dokter medico humano. (fuente: Brodeur et al. 2024, Arxiv).

Inteligencia Artificial, a descubri metodonan pa traha panel solar hopi mas eficiente y barata (fuente: J Wu et al, Science, 2024)

Inteligencia Artificial, ta descubri metodonan di haci agricultura mas eficiente usando mRNA di matanan agricultural. (fuente: Nature Machine Intelligence).

Segun Goldman Sachs casi 70% di tur trabou humano por wordo automatisa parcialmente. (fuente: Goldman Sachs).

Tur e ehempelnan aki ta posible ya caba, awo kier pidi un lector pa purba imagina kico lo porta posible den 10 of 20 aña, cu e tendencianan aki no solamente sigui avansa, pero avansa mas rapidamente cada aña.

Sociedad mester prepara adecuadamente

Nos por nota cu tin diferente tendencianan innovativo cu ta avansando exponencialmente, esaki tambe lo nifica cu nan impacto lo bin mas y mas rapido. Tambe nos como sociedad mester ta prepara pa diferente scenarionan cu e diferente innovacionnan ta trece cu nan.

E ehempel mas grandi ta di automatisacion cu AI, cual ta e tema cu nos a toca siman pasa. Pero tambe aspectonan manera Energia Solar, na prijs super atractivo, 3D Printing di Cas bahando prijs di construccion cu 70% y nos por sigui.

Tur e tendencianan tecnologico menciona ta bay tin impacto sumamente grandi pa sociedad, no solamente pa e sector en cuestion solamente, pero tambe via spill-over effects masivo.

Ehempelnan lo por ta, kico lo ta e futuro di Elmar N.V. den 10 pa 20 aña? Kico ta e futuro di educacion den e decadanan cu ta bin cu AI mas y mas potente? Con nos como sociedad lo vang op trabounan cu lo wordo automatisa den un manera socialmente husto?

Na otro banda tambe por puntra nos mes aspectonan sumamente positivo: Kico nos lo por haci si prijs di energia baha pa menos cu 10 cen florin pa kWh? Con nos por alivia scarsedad di vivienda si prijs di construccion baha cu 70%? Si varios aspecto di ley y medicina wordo automatisa kico nos como pueblo por haci cu tur e cost-savings?

E preguntanan aki ta sumamente grandi y dificil pa yega na un contesta na nan zomaar. Anos como sociedad mester cuminsa pensa over e temanan strategico aki y na su debido tempo bin cu tal respuestanan cu ta beneficia full sociedad den e manera mas miho y socialmente husto riba plaso largo.