Ciclistanan ta pone nan propio bida den peliger door di no respeta ley di trafico

Na mesa di redaccion di Bon Dia Aruba a yega informacion di preocupacion pa e manera con algun ciclista ta core riba caminda publico. Riba potretnan comparti anonimamente, por observa con un grupo di ciclista ta core riba brug estilo peloton, strobando trafico y poniendo nan mes y otro usuarionan di caminda den peliger.

Varios biaha den pasado a bin cu actividad di conscientisacion pa comunidad tocante e peliger cu ciclistanan ta confronta den trafico. Aki por menciona e actividad di fundacion Biking Squad Aruba na november 2022, y e Ride of Silence na mei di e mesun aña. E actividadnan aki ta enfoca riba conscientisa automobilistanan pa tene cuenta cu ciclista riba caminda, considerando e cantidad di accidente, hasta fatal, cu ciclista ta sufri durante cu nan ta core riba caminda.

Sinembargo, poco ta conscientisa riba e obligacionnan cu e ciclistanan tin riba caminda, unda nan tambe mester haci uso corecto di e caminda. Aki automobilistanan frecuentemente tambe ta expresa frustracion pasobra e ciclistanan ta exigi respet riba caminda, pero nan mes no ta respeta ley di trafico, poniendo bida di nan mes y di otronan den peliger. Riba e potret nan por observa ciclistanan coriendo memey di caminda, den rij di mas cu dos, strobando trafico di pasa y coriendo insigur.

Ciclistanan cu kier train di manera safe, por haci uso di areanan menos transita of por ehempel di Linear Park, pero sigur un brug ta e caminda menos adecua pa core bicicleta, y menos coriendo memey di caminda unda no ta laga espacio pa autonan pasa na banda y ta tene trafico pega. Por compronde cu pa yega cierto lugar e ciclistanan mester core den grupo riba caminda, pero ta suplica pa respeta reglanan di trafico.

Esakinan ta inclui cu no mag core mas cu dos persona banda di otro. Tambe e ciclista mester core lo mas pega na banda rechts cu ta posible, y tambe mester permiti pa automobilistanan pasa e ciclista.

Na 2022, e organisadornan di Ride of Silence a reconoce cu pa añas tin debate riba infrastructura pa ciclista.

Sinembargo, esey no ta kita afo cu mester por educa tur hende, adulto como hoben riba respet y protocol pa un trafico sigur. Y e educacion aki mester inclui e ciclistanan mes.