Algun persona den comunidad a entrega un carta na formado di gobierno pa asina vocifera nan preocupacion pa ciclistanan riba e isla. E grupo tin un propuesta pa bini cu un campaña di conscientisacion pa automobilista y tambe un grupo di interes cu lo por pensa hunto pa soluciona problemanan cu ciclismo ta enfrenta riba nos isla.

Despues cu den e ultimo lunanan tras di lomba a sosode varios accidente di bicicleta, den algun caso hopi grave, a haci cu ayera den oranan di atardi Annemarie Melchers di TriBike y Jurgen van Schaijk di Amsterdam Manor Beach Resort a dicidi pa presenta un carta riba e tema aki na Formado Evelyn Wever-Croes. Den tal carta ta pidi pa pone atencion riba ciclismo di Aruba den e acuerdo gubernamental nobo.

Durante un splicacion na Bon Dia Aruba, sra. Melchers ta splica cu den e ultimo añanan por mira cu ciclismo como un deporte y manera di transporte ta creciendo. Specialmente den e ultimo 5 añanan. “Bo por wak cu tin hopi ciclista riba caminda. Alabes tin mas accidente ta tumando luga y no tin mucho claridad riba leynan of reglamento ora ta trata di e grupo aki”.

Conscientisacion di comportacion riba caminda

Segun sra. Melchers, por mira riba social media cu tin mas tension entre automobilista y ciclista riba caminda ultimo tempo. E ciclistanan ‘no ta sinti nan mes sigur riba caminda’. Pa e rason aki hopi ciclista ta scoge di core den grupo pa por tin mas bista riba nan. Pero hustamente esaki ta percura cu automobilistanan ta sinti nan mes stroba pa un grupo di ciclista.

Sinembargo un gran cantidad di accidente envolviendo ciclista ultimo tempo tabata trata di personanan individual, segun sra. Melchers. “Por ehempel e accidente cu e hoben na Colony unda bo ta kere hende lo core mas sigur. Esaki ta kico nos kier evita pasobra e hoben ta interna ainda na Colombia y parce e no ta bay por cana mas”.

E solucion lo mester bay bin di ambos banda, segun sra. Melchers. E no ta kere cu simpelmente ta automobilista ta core sin consideracion pa trafico riba bais. “Mi a yega di nota di ciclista tambe cu ta core sin luz y cu ta core den contrario, pues tambe mester bin mas conscientisacion riba kico bo tin cu haci ora bo ta ciclista riba caminda”.

E solucion cu sra. Melchers y sr. Schaijk ta propone ta pa bin cu un campaña di conscientisacion di parti di gobierno pa por educa automobilistanan pa tene cuenta cu ciclista riba camindanan publico. Pero tambe ta pidi gobierno pa reserva fondo den presupuesto di e proximo periodo di gobernacion pa desaroya ciclismo mas ainda na Aruba. Tambe pa medio di ampliacion y mantencion di e netwerk di ciclistanan y educacion riba uzo di bicicleta na scolnan.

Grupo di interes pa ciclismo: Cycleboard

Nan no ta kere cu e gobierno mester enfrenta e situacion riba nan mes. E grupo ta propone pa bou e contexto di hunto nos ta para mas fuerte, establece hunto cu otro partidonan involucra den ciclismo y gobierno, un cycleboard.

“Nos kier forma un grupo cu diferente persona y experto den comunidad pa pensa hunto con pa forma y conecta e fietspaden di diferente bario, entre otro”. Den e grupo aki lo mester tin por ehempel personanan cu por representa DOW y personanan cu conocemento pa traha ley. Y naturalmente diferente tipo di ciclista.

Apart di e aspecto di siguridad riba caminda, ta importante pa considera cu mas ciclismo por trece mehoracion den diferente areanan pa nos isla, segun sra. Melchers. Tanto den sentido social como den sentido economico. Mas ciclismo y un miho ambiente pa sostene esaki lo por trece mas turista di cierto tipo na nos isla. Tambe sra. Melchers ta subraya cu pa hobennan e por contribui na nan independencia.

“Si muchanan por yega scol cu bicicleta, esaki lo alivia trafico y tambe laga e muchanan cu un sintimento di autonomia. Manera cu e ta awo muchanan ta depende di nan mayor pa hiba nan tur caminda. Pero tambe e parti di medio ambiente lo sinti un alivio”.

Iniciativanan

Tri-Bike, como club y negoshi ta organisa training di mountain bike semanalmente pa mucha y hoben di 6 pa 18 aña riba diasabra mainta. Tambe competencianan varios biaha pa aña. Riba nivel mas general nan tambe ta envolvi cu proyectonan cu ta tuma luga, manera e proyecto di ciclismo cu a tuma luga aña pasa. “Esaki a encera cu gobierno a pidi e federacion di ciclismo Aruba Wieler Bond (AWB) y e clubnan di ciclismo pa yuda pensa con e fietspaden na Aruba por wordo mehora”.

Bon Dia Aruba ta den espera di comentario di Formado Evelyn Wever-Croes riba e carta cu a wordo entrega na su persona y tambe loke ta trata e preocupacionnan di ciclista. Riba esaki nos lo elabora den nos proximo edicion.

Update
Nos a haya un reaccion di formado sra. Wever-Croes awe mainta. E formado a para tras di pensamento cu mester bin mas atencion pa siguridad di coredo di bicicleta.

Formado a priminti di haci un afspraak den curso di siman pa por ricibi e carta cu e grupo a traha. Sra. Wever-Croes lo divulga mas informacion unabes un reunion tuma luga entre su persona y e grupo di ciclista.