Ciclistanan di capital Mexicano ta uni pa yuda despues di temblor

Tur cos a cuminsa cu un grupo di WhatsApp, un idea y un man yen di ciclista cu gana di yuda.

“E temblor a sucede, y e dia siguiente mainta ya nos tabata papiando pa hiba e proyecto dilanti.  Den tres ora, nos a aterisa nos idea y nos a pone cana. Pa un or di merdia ya nos tabatin aviso y cuenta na rednan social,” Fernando García (36) ta conta, uno di e mas di 50 boluntario di #AcopioEnBici, un iniciativa crea pa ciclista cu  ta uza nan bicicleta pa transporta e ayudo di personanan cu no por yega na e centronan di acepta donacion, cu ta reparti riba henter e teritorio grandi di e capital Mexicano. E trafico dificil den e ciudad ta haci traslado cu auto un gasto hopi halto den placa y tempo.

“No ta importa unda nan ta (e dunadonan), semper lo tin un di nos ciclistanan den e zona ay,” García a bisa. Te awor, mas di 50 persona a duna cien nan di kilo di ayudo – manera alimento, bruki, producto di higiena personal y otro – pa e victimanan di e temblor di 8.2 grado den escala di Richter cu a suta Oaxaca y Chiapas e nochi di diahuebs 7 di september. Segun Servicio Sismologico Nacional, e tabata e di dos mas fuerte registra den historia di Mexico, lagando atras casi 100 morto, decenas di miles di herida, miyones den perdida economico y alrededor di 1.067 replica den solamente tres dia.