Diahuebs director di Agencia Central di Inteligencia di Merca (CIA), Mike Pompeo a yama atencion pa e riesgo, cada biaha mayor, di e posibilidad cu e grupo miho conoci como “milicia arma” di Venezuela, por actua for di control. El a alerta tambe tocante e riesgo halto cu e transferencia di arma desde Venezuela por nifica pa otro paisnan.
Durante un reunion den comision di inteligencia di Senado di Merca tocante algun menasa rond mundo, director di CIA Pompeo a toca un punto importante, relaciona cu e crisis na Venezuela, en especial tocante e milicia miho conoci como “colectivo” y e cantidad grandi di arma di candela cu nan tin y cu por tin e riesgo cu e armanan ey por “cay den man robes”.
“E riesgo cu e grupo colectivo por actua for di control ta aumenta di minuut pa minuut,” Pompeo a splica. El a papia tocante milicia arma di gobierno di Nicolas Maduro, cu ta defende e interes di e grupo chavista, contra movimento di oposicion.
Tin hopi arma di candela circulando na Venezuela y e riesgo ta increibel, pero real y hopi serio. E situacion aki “ta un menasa pa Sudamerica, Centroamerica y no pa Venezuela solamente,” Pompeo a bisa. Te na e momento aki CIA no a detecta ningun traslado grandi di arma di candela.
Dan Coats, Director nacional di inteligencia a bisa cu “ gobierno di Venezuela lo busca dia tras dia mas medio represivo, pa asina purba di controla hende di oposicion y disturbio cu ta tuma lugar riba caya”.
“Petroleo pa hopi aña ta un fuente di placa pa gobierno, pero e gestion malo di e mesun gobierno a disminui e produccion di placa y e cantidad di divisa cu ta drenta na Venezuela. Nos ta studiando kico gobierno lo ta haci pa asina controla inflacion, e pago di su debe, como tambe importa producto basico y medicina,” Coats a resalta tocante Venezuela.
