Maurice Neme, un di e doñonan di Chupitoz Shotbar a comenta na Bon Dia Aruba cu nan tin nan permisonan na ordo y cu no tin niun problema cu autoridadnan manera a sali den prensa antayera.
Riba diaranson anochi 21 di december a sali den noticia y rednan social cu districto di Polis Noord a haya nan den un situacion fastioso na e luga. A ser publica cu e establecimento no tabata dispone di un permiso pa habri. Nan ta menciona tambe cu Minister di Husticia a para duro pa no habri e luga tanten cu e permiso no ta na ordo. Chupitoz Shotbar tabata habriendo nan portanan pa prome biaha na localidad di Ex Señor Frogs y segun gerencia, nan a habri normal e dia ey anto tur cos a bay bon. Bon Dia Aruba a acudi na Ministerio di Husticia. Nan ta confirma nos cu na ningun momento minister di Husticia a bisa cu e luga no tabata tin permiso.
Politica
Algun siman atras tabata tin un confrontacion entre polis y doñonan di +297 Restaurant cu a bay completamente for di man. Riba rednan social, a wordo comenta cu doñonan a haci un yamada na un minister pa interveni den e situacion. Den e caso aki na Chupitoz Shotbar, segun informacion no oficial, Prome Minister a yama y bisa cu Chupitoz por keda habri aunke cu nan no tin permiso. Segun sr. Neme, e ta lamenta cu den ambos di e casonan aki mester a envolve politica innecesariamente. “Ami no sa nada di esey, ami no ta papia cu politiconan. Mare cu nos por a haya fabornan politico pasobra esey no ta e caso. Nos a caba di habri den e area aki netamente den ‘high season’ aportando cu un otro atraccion turistico”, sr. Neme ta splica.
Segun gerencia nan no a kibra ningun ley anto Bon Dia Aruba a puntra riba e vehiculo staciona riba acera cual nan ta contesta: “Nos sa para e auto eynan aki aya anto mi no ta mira kico ta e problema.”
Bon Dia Aruba a busca den e registro di Camara di Comercio riba e nomber di Chupitoz pa wak si nan tin un permiso di negoshi. Pero esaki no a duna resultado.
