Cu obhetivo di duna un regalo di Pasco na muchanan den necesidad y asina haci nan feliz, Grupo Mi Mami ta organisando su di cuater edicion di Christmas Toy Drive cu lo tuma luga na Cas di Cultura.

Segun e tradicion for di basta decadanan pasa, ta duna regalonan na personanan mas stima na temporada di Pasco unda cu ta festeha e nacemento di Niño Hesus.

Rachel Murray presidente di Mi Mami a expresa cu diasabra awor dia 11 di december lo tuma luga nan recoleccion di juguete of coy di hunga dilanti di Cas di Cultura estilo ‘Drive By’ for di 10or di mainta te cu 6or di atardi, cu tur e medidanan y protocol cu ta vigente pa Covid-19.

El a splica cu personanan por trece e coy di hunga los sin papel di regalo pa motibo cu despues nan lo empaketa di un manera bunita dependiendo di edad di e muchanan, nan mes tin un ekipo forma pa empaketanan na unda diferente fundacion y organisacion ta uni y asina despues nan ta entrega esey na famianan cu menos recurso e aña aki.

Nan tambe lo yuda e dia siguiente pa e fin di siman lo entrega tur e co’i hunga cu a ser recauda na tur e famia pa di e forma ey nan lo por haya nan regalo prome cu Pasco y otronan lo haya pa dia di Pasco mes, pa motibo cu pa e grupo esey ta algo cu ta duna na nan hopi ‘feelings’, “ora bo yega na un famia e dia mes di Pasco cu un regalo, ta algo hopi bunita mes” el a declara.

Aña 2020 Mi Mami a logra cera un total di 500 pakete na unda tambe tabata un evento hopi exitoso unda basta hende a comparti cu nan y colabora segun el a sigura, e aña aki tambe nan ta espera di conta cu e apoyo di henter comunidad pa asina haya mas co’i hunga y juguetenan posibel pa duna na muchanan.

Manera ta conoci, aña pasa tabata un aña cu a trece hopi reto den famianan pa motibo di pandemia na unda tin algun personanan cu ta indica cu un juguete no ta mescos cu un comestibel, pa cu esaki Murray a enfatisa cu un mucha no ta compronde nan situacion, e mucha no sa kico e mama por ta pasando aden, “e simpel hecho cu e tin un regalito pa habri toch, pa haci su curason un tiki contento, e ta desvia un poco di loke e por ta pasando aden”, el a bisa.

Esey ta loke nan kier trece dilanti tambe, un conscientisacion na otro muchanan cu por ta nan no ta usa un juguete mas pero otro mucha si lo por aprecia esey.

“Esaki ta dirigi na mayornan cu no djis bin trece coy di hunga pasobra bo kier haci bo cas limpi, no. Trec’e, sinta cu e mucha, scoge un juguete y splik’e e importancia di gratitud, di balor, con pa comparti cu otro muchanan cu no tin nada, esey ta un momento pa bo splica bo yiu kico ta gratitud y compartimento y ta esey loke nos kier encurasha tur mayor pa haci, pa siña nan di chikito”, Murray a comenta.

Mi Mami ta un grupo priva di Facebook cu tin un cantidad di 9.000 miembro cu pa cada aña ta sigui subi, Murray a splica cu nan ta duna apoyo na mamanan cu tin mester di un conseho, duna apoyo y sosten cu diferente hermentnan pa asina nan por ehecuta nan tarea di cada dia: Ta mama.

E grupo ta organisa diferente actividad hunto cu otro gruponan cu ta uni personalmente pa por comparti experiencianan.

“E no ta facil, e trabou di mama ta uno na unda bo ta keda siña tur dia manera cu bo yiunan ta crece y cada rato bo ta bin cu un preocupacion of un pregunta y den e grupo bo por siña di un otro tambe y siña e otronan”, Murray a finalisa.

“Kindness is a gift everyone can afford to give.”