Den un entrevista cu e musico Chris Kross, el a conta nos un poco di su carera profesional como guitarista y productor, y tambe a splica nos un poco mas di su proyecto KrossHart.

Chris a cuminsa cu musica desde apenas 7 aña di edad tumando su prome les di blok fluit, locual a cuminsa un pasion, cu mas di 15 aña despues, ta un parti esencial di su bida.

“Nos ta un famia toch wel basta musical y semper mi tabata interesa den musica. Mi mayornan poco poco a hinka mi den mas lesnan di musica y ora cu mi tabatin 14 aña mi a haya mi prome guitara, eynan tur cos a cuminsa y di eynan mi no a stop di toca mas”, Chris ta conta.

Chris a sigui su estudio den musica y na Merca el a studia Contemporary Writing and Production na Berklee College of Music. “E studio tin di haber cu e parti di skirbimento di musica y e parti di produccion tambe di musica mes”, el a splica.

Chris ta yama su mes un guitarista y e ta presenta su mes hopi caminda na nos isla como guitarista, y e por toca piano y baho tambe, pero e ta splica cu den musica tin hopi otro cos cu por haci apart di toca un instrument.

“Den musica bo por haci otro cos tambe y no precisamente bo mester toca un otro instrument, por ehempel ami ta enfoca hopi riba e parti di skirbimento di musica y e parti di produccion di musica tambe”, Chris a bisa.

E proyecto KrossHart a cuminsa casi 10 aña pasa caba, y tabata e vision di Chris Kross hunto cu Siegfried Hart.

“E idea pa cuminsa e proyecto a bin paso semper nos tabata toca hunto, pero despues nos tur dos a bay studia afo y ora mi tabata biba na Spaña cu mi a bay vakantie Hulanda, nos a topa porfin nos tur dos tabata hopi mas den tecnologia y ora nos a dicidi di ban purba di graba algo, ban purba di bin cu algo y eynan e proyecto a cuminsa”, el a splica.

E meta di e proyecto KrossHart, Chris ta bisa ta pa “pa sigui cu e legado di jazz pasobra cu aworaki ta nos generacion su turno pa bin cune, pero nos ta bin cune un tiki diferente paso nos ta hacie nos mesun estilo, nos tin nos mesun influencianan cu ta hacie diferente compara cu antes”.

Actualmente Chris tin su mesun studio unda e ta traha su musica y ta duna les di guitara, teoria y ear-training tambe.

Por ultimo Chris ta duna su mensahe na hobennan cu tin e interes pa drenta den e mundo di musica.

“Musica ta un tremendo recurso pa hendenan por semper bay cerca dje anto expresa nan mes, y no solamente pa expresa, tambe pa disfruta, esey ta un parti hopi importante tambe. Musica ta algo cu semper lo t’ey pa nos tur, kiermen nos tin cu use, paso e t’ey pa nos”, Chris a bisa.