Chon Theodora ta bolbe subi e lista di MPB i ta preparando pa participa na eleccion di Conseho Insular na maart 2023.

Chon a nace na Boneiro den e bario di Antriol pariba como e yiu mas chiki di Clara Theodora-Statie y Ròbert Theodora. Cu 5 aña el a bay biba na Corsou cu su mayornan haciendo su estudionan cu exito. Pero tog su prome trabou tabata na Boneiro pa Radio Nederland Wereld Omroep. Despues e ta regresa Corsou pa drenta enseñansa como docente, pa 38 aña despues regresa Boneiro como pensionado.

Na Boneiro Chon a contribui pa un periodo di tres aña cu enseñansa na SGB pa despues sigui solamente cu actividadnan boluntario manera entre otro :Entrevistado pa Fundacion Historico Cultural Boneriano (FUHIKUBO), caminda e ta yuda rescata nos balornan historico cultural. Ko-presentadó di e programa radial “Beku”. Sostenedo di comision “Luna Yén”.Secretario di Vereniging AOV-belangen Curaçao (VAC), pa medio di cual mester a sali na defensa di nos pensionadonan, pa reestablece nan pension di behes fo’i Corsou conforme ley.Yuda entretene nos grandinan den forma musical.Miembro di grupo musical “Villa ta canta”.Miembro di organisacion “Man on the Move”.Miembro di directiva di “Movemento di Pueblo Boneriano”.Miembro di Dialooggroep

 

Chon ta un hende cu no por para keto y ta gusta core baiskel, cana, landa pero su pasion ta den musica, cultura y historia. Den Antriol pariba el a restaura cas di su mayornan caminda el a nace convertiendo esaki den un museo chikí cu yama, “Mi Kuna”.

Tocante su embolbimento cu politica e ta comenta: ‘Nunca mi a pensa di drenta politica, sino te ora cu mi a yega Boneiro y mira con e pueblo tabata anhela pa un cambio den e sistema anticua di hiba politica. Mi a tuma mi decision liber pa drenta Movemento di Pueblo Boneriano – MPB na 2019, pasobra pa mi esaki ta e unico organisacion politico cu ta tin e capacidad pa por contribui positivamente cu desaroyo di Boneiro.

Para na banda reclama sin bini cu alternativa concreto, no ta mi estilo. P’esei mi kier contribui pa yega na un pueblo bon forma y educa, caminda ta lanta lidernan nobo bon prepara pa tuma rienda di nos dushi Boneiro.Solamente un pueblo bon forma por opina y tuma decision di un manera sano pa adelanto di su isla stima.

MPB ta e unico partido politico cu no solamente ta percura pa lidernan ta capacita pa por sirbi como gobernante, pero tambe pa hiba un politica civilisa.

Mi ta sigur cu mi tambe por yuda carga e vision di MPB, pa yega na un Boneiro cu por ofrece cada ciudadano oportunidad husto pa sigui progresa den bida. Boneiro mester di nos, ban yuda cu su desaroyo. Chon su mensahe ta: Ban pa un Boneiro cu lidernan nobo, confiabel y cu capacidad pa goberna!‘