(AP) – Chipre a bisa diasabra cu lo suspende procesa tur solicitacion di asilo di ciudadanonan di Siria pa motibo cu cantidadnan grandi di refugiado di e pais den guera ta yega e isla via boto, primeramente for di Libanon.
Den un declaracion por escrito, e gobierno di Chipre a bisa cu e suspension tambe ta parcialmente a causa di esfuersonan pa e Union Europeo (UE) redesigna algun area di e pais como zonanan safe pa asina personanan por bolbe nan nacion.
E paso drastico ta bini net despues di e president di Chipre Nicos Christodoulides na Libanon e siman pasa pa apela na autoridadnan di e pais stop e salida di botonan yen di migrante na nan costa. E peticion aki ta bini den bista di un aumento di 27 biaha di yega di migrante na Chipre te cu awo compara cu e mesun periodo di aña pasa.
Segun Chipre su Minister di Asuntonan Interno, algun 2,140 persona a yega via boto na e pais miembro di UE entre dia 1 di januari te dia 4 di april, e gran mayoria di nan ciudadano di Siria cu ta sali for di Libanon. Den contraste, solamente 78 persona a yega via boto na e nacion den e periodo corespondiente aña pasa.
Riba dialuna, Christodoulides y Prome Minister di Libanon, Najib Mikati a haci un yamado na UE pa provee sosten financiero pa asina yuda Libanon stop e migrantenan di por yega Chipre.
Dianan prome cu su biahe pa Libanon, e president di Chipre a bisa cu el a personalmente pidi e hefe di e comision di UE, Ursula von der Leyen pa intercede cu e autoridadnan di Libanon pa nan combati e sali di migrante. Aunke UE mester provee sosten “substancial” na Libanon, e ta bisa cu cualkier ayudo financiero mester keda relaciona na con efectivamente e autoridadnan monitor nan costa y preveni e salidanan aki.
Libanon y Chipre ya caba tin un trato bilateral unda e autoridadnan di Chipre lo debolbe e migrantenan cu purba yega e costa via Libanon. Sinembargo Minister di Interior di Chipre Constantinos Ioannou a bisa cu Libanon no ta cumpliendo cu su responsabilidad di e trato a causa di presionnan domestico.
Libanon, cual ta lidiando cu un crisis economico severo desde aña 2019, tin mas o menos 805,000 refugiado registra cu Nacionnan Uni, di cual 90 porciento ta biba den pobresa. Oficialnan di Libanon ta calcula cu e cantidad real ta hopi mas halto, entre 1.5 pa 2 miyon. Varios a scapa e guera civil den nan pais, cual ta drentando su di 14 aña.
Ioannou e siman aki a bishita Dinamarca, Czechia y Grecia pa asina genera sosten pa un empuhe na UE pa declara cierto partinan di Siria como safe. Haci esaki lo permiti e nacionnan di UE manda e ciudadanonan di Siria na e areanan “safe” aki.
E Minister di Chipre a bisa cu su persona y su coleganan di Czechia y Dinamarca lo crea un documento oficial pa e ehecutivo di UE pa asina ricibi un dialogo formal tocante e zona ‘safe’.
