(AFP)—Prome minister Canades Justin Trudea a anuncia ayera cu Canada lo lansa un atake riba e guera di comercio di presidente Mericano Donald Trump, causando mas menasa di represalia for di e presidente despues cu tarifanan halto contra Canada, Mexico y China a tuma efecto.
Un Trudeau rabia a acusa Trump di purba causa e collapse di Canada su economia pa haci’e mas facil pa Merca anexa su pais, y a critica Washington pa dirigi atake riba un aliado cercano mientras tanto “dunando Rusia su kier” tocante Ucrania.
Preocupacionnan cu e conflicto di tarifa ta transformando rapidamente den e guera di comercio mas bruto den temponan moderno a manda mercadonan rond mundo cay, cu e S&P 500—un index importante di Wall Street—extendiendo mas perdida pa deshaci di tur su ganashi desde e victoria di Trump den eleccion presidencial na november.
Trump a anuncia—y despues a pone pausa riba—tarifanan di 25% riba importacionnan for di partnernan comercial Canada y Mexico na februari, acusando nan di fracasa pa stop inmigracion ilegal y trafico di droga. Pero el a continua cu nan ayera, citando un falta di progreso riba ambos frontera. Y despues cu Canada a tuma represalia, Trump a menasa atrobe pa impone mas tarifa, burlando di Trudeau su posicion como e premier di su pais.
“Por fabor splica Gobernador Trudeau, di Canada, cu ora e pone un Tarifa Represalia riba Merca, nos Tarifa Reciproco lo aumenta pa un suma igual!” el a skirbi den un publica riba su plataforma Truth Social, referiendo na e lider Canades cu e titulo usa pa lidernan di estadonan Mericano.
E ordennan lo afecta importacionnan Mericano for di ambos bisiña Norte Americano, afectando tur cos for di avocado pa madera importante pa construccion di cas, y strobando e cadena di suministro pa sectornan clave manera automobilnan. Trump tambe a firma un orden dialuna pa aumenta un tarifa di 10% riba China pa 20%–agregando riba tarifanan existente riba varios producto Chines.
Beijing a condena e “imposicion unilateral di tarifa pa Merca,” entregando un keho cu e Organisacion Mundial di Comercio y menasando un tarifa di 10 y 15% riba varios importacion agricultural for di Merca.
Ottawa su tarifa reciproco di 15% riba productonan Mericano cu un balor di 30 biyon dollar a bay den efecto ayera trempan, y Trudeau a bisa cu nan lo expande pa “e resto di e productonan Mericano di 125 biyon dollar den 21 dia.”
China a bisa cu su tarifa contra Merca lo bay den efecto otro siman y lo afecta dies biyones di dollar den importacion, for di bonchi di soya pa galiña. Beijing tambe a anuncia cu importacionnan di madera Mericano a ser suspendi, y cu carganan di bonchi di soya for di e tres exportador Mericano a keda para, mientras e ministerio di Asunto Exterior di e pais a priminti pa bringa e guera comercial di Merca “te na e final.”
