(AP) – China su vigilante di internet a propone algun regulacion pa combati e tempo cu muchanan ta pasa riba nan smartphone, marcando e golpi mas recien na companianan manera tencent of ByteDance, cual ta crea plataformanan di red social y weganan online.
Cyberspace Administration of China a publica riba diaranson guianan riba su website, declarando cu menornan no lo mester ser permiti haci uso di mayoria servicio di internet riba celular di entre 10or di anochi te cu 6or di mainta, y cu muchanan di entre 16 pa 18 aña di edad mester limita uso di internet na maximo 2 ora pa dia.
Muchanan entre edad di 8 pa 15 mester usa internet pa solamente 1 ora pa dia, mientras esunnan bao di 8 aña mester ser permiti 40 minuut so. Solamente cierto servicio manera aplicacion of plataformanan ta considera apto pa e desaroyo fisico y mental di e menornan lo ta un excepcion. CAC no a specifica cua e servicionan aki lo ta.
E restriccionnan ta Beijing su esfuerso mas recien pa purba di limita adiccion na internet, un problema cu e ta mira como amplio dentro di e hubentud. Den aña 2019, Beijing a limita e muchanan su tempo online hungando wega na 90 minuut pa dia y a haci e restriccionnan aki mas estricto den aña 2021, permitiendo solamente 1 ora di wega online riba diabierna, weekend y dianan festivo.
E restriccionnan recien aki ta impacta companianan manera Tencen, China su compania di weganan online mas grandi y ByteDance, cual tin e plataforma sumamente popular, y version Chines di TikTok, Douyin. Agencianan na China hopi biaha ta esun cu ta keda responsabel pa aplica e regulacionnan.
CAC a bisa cu e guianan aki ta habri pa ricibi feedback te cu dia 2 di september. No a bisa ki dia e reglanan nobo lo drenta den efecto.
