(AP) — China a haci un yamado pa cese al fuego y negociacionnan pa paz entre Ucrania y Rusia ayera, y presidente Ucraniano, Volodymyr Zelenskyy cautelosamente a duna bon bini na e participacion di China – pero a bisa cu exito ta bay depende riba accion y no palabra.
Beijing ta bisa di tin un postura neutral den e guera cu a cuminsa un aña pasa, pero tambe a bisa cu tin un “amistad sin limite” cu Rusia y a nenga di critica e invasion Ruso di Ucrania, of hasta referi na dje como un invasion. El a acusa occidente di provoca e conflicto y empeora e situacion door di provee armanan di defensa na Ucrania.
Zelenskyy a bisa cu e ta kere cu “e hecho cu China a cuminsa papia di Ucrania no ta malo. Pero e pregunta ta kico ta bin tras di e palabra.”
E plan publica pa ministerio di Exterior Chines principalmente a reitera posicionnan cu ya tabatin, y analistanan a bisa cu Beijing lo ta un negociador improbable. Pero algun observador a adverti cu Ucrania y su aliadonan mester ta cauteloso, bisando cu un rechaso di loke China ta mira como su intento pa paz por move Beijing mas cerca di duna arma na Rusia.
Ucrania tambe por mira “un scenario den cual China ta al menos presionando Rusia pa contene e uso di arma nuclear y crea un mecanismo pa controla plantanan di energia nuclear na Ucrania”, segun Volodymyr Fesenko, cabesante di e think tank Penta Center basa na Kyiv.
Di banda di Beijing, mester a clarifica su posicion hasta si Kyiv y Moscu no haci mucho caso, segun Shi Yinhong, un profesor di relacion internacional na Universidad Renmin di Beijing.
E propuesta di China ta haci un yamado pa respeta e integridad teritorial di tur pais, pero no ta bisa kico ta bay pasa na e regionnan cu Rusia a ocupa desde e invasion. Tambe ta haci un yamado pa un fin pa sancionnan “unilateral” riba Rusia, indirectamente ta critica e expansion di aliansa NATO, y ta condena menasanan di forsa nuclear.
Ministerio di Exterior Ruso a duna bon bini na e propuesta bisando cu ta comparti ideanan di China, incluyendo e rechaso di sancionnan occidental. Na mes momento, vocero di e ministerio Maria Zakharova a a reafirma e demanda di Moscu pa Ucrania reconoce e teranan ocupa pa Rusia, renuncia su campaña pa join NATO y asumi un status neutral, entre otro condicionnan pa paz.
Ucrania a bisa cu no ta bay di acuerdo cu ningun paz sin cu debolbe henter su teritorio.
Consehero di Zelenskyy, Mykhailo Podolyak a tweet cu cualkier plan di paz cu tin vision di solamente un cese al fuegoy ta permiti Rusia continua ocupa cualkier parti di Ucrania “no ta tocante paz, sino pa freeze e guera, derota Ucrania, e siguiente etapanan di genocidio Ruso.”
