Oficialnan Chines lo prefera di mira e app di video cortico, TikTok cera na Merca na luga di su compania mama, ByteDance forsa di bende su operacionnan Mericano, segun Reuters a reporta diabierna.
Oficialnan ta preocupa cu benta di operacion Mericano pa motibo di presion di administracion di Trump lo pone China y ByteDance mustra zwak, Reuters a bisa, citando tres persona cu conocemento directo di e asunto.
Un vocero di ByteDance a bisa cu ‘gobierno (Chines) nunca a sugeri na nos cu nos mester shut down TikTok na Merca of ningun otro mercado’.
ByteDance ta den negociacion cu varios compania pa bende su operacionnan Mericano, despues cu presidente Donald Trump a duna un orden ehecutivo na augustus cu lo prohibi TikTok na Merca a menos cu bende e operacionnan na otro compania prome cu dia 20 di september. E orden ehecutivo ta cita preocupacion pa siguridad nacional cu gobierno Chines por usa e data compila di TikTok pa ‘track ubicacion di empleado- y contratistanan federal, construi dossiernan di informacion personal pa chantahe, y conduci spionahe corporativo’.
E fecha limite oficial no ta cla. Despues cu un cuerpo di seguridad di gobierno a revisa operacion Mericano di TikTok, e presidente a duna un segundo orden ehecutivo cu ta pone un fecha limite dia 12 di november. Den informacion pa prensa, Trump tambe a menciona un fecha limite dia 15 di september, cual el a bisa diahuebs ultimo cu no lo extende.
TikTok y ByteDance a reta e orden ehecutivo, demandando tanto Trump como secretario di Comerci Mericano, Wilbur Ross tocante e prome orden. Den e demanda, TikTok ta bisa cu e orden di Trump a viola e clausula di debido proceso den di Cinco Amienda, pasobra e administracion no a duna e compania e oportunidad di wordo scucha. E demanda tambe ta acusa e presidente di actua mas leu cu su autoridad legal, pasobra su administracion no a proba cu evidencia cu TikTok ta representa un menasa pa seguridad nacional.
TikTok a bisa cu ta tene data di usuarionan Mericano na Merca, cu backup na Singapore. E compania tambe a bisa cu no lo entrega data na gobierno Chines, ni hasta si e ricibi peticion pa haci esaki.
Microsoft y Walmart, hunto cu otro companianan, ta den negociacionnan cu ByteDance pa adkiri operacionnan Mericano di TikTok, pero ainda no a anuncia un acuerdo. Ta parce cu e acuerdo ta retrasa pasobra China a cuminsa restringi e exportacion di tecnologia di inteligencia artificial. ByteDance lo por bay dilanti solamente cu un acuerdo bendiendo operacion Mericano di TikTok sin inclui su aligoritmonan clave.
Embahada Chines na Merca a mustra riba comentarionan cu vocero di ministerio di Exterior Chines, Zhao Lijian, a duna reporteronan tocante TikTok diabierna. “China ta opone e supresion inhustifica y enfoke riba e companianan no-Mericano aki, door di abusa nan poder estatal bao e pretexto mas debil di siguridad nacional”, el a bisa.
