(AP) — Minister di Exterior di China a apela na su contraparte Hulandes pa defende comercio liber despues cu Hulanda y Hapon a bay di acuerdo pa coopera cu restriccionnan di Merca riba acceso di China na tecnologia avansa di chip procesador pa motibo di preocupacion pa seguridad.
Ministerio di Exterior no a duna indicacion ayera si Qin Gang directamente a adresa e controlnan den su yamada di telefon cu minister Wopke Hoekstra. Pero un vocero di ministerio a ripiti kehonan haci anteriormente contra Merca cu otro gobiernonan tabata purba di haci daño na companianan Chines.
Qin a bisa cu Hulanda y China “conhuntamente mester mantene e stabilidad di e cadena industrial internacional y cadena di suministro,” segun Mao Ning.
Hoekstra a bisa riba Twitter cu el a papia cu Qin riba dialuna, pero no a duna detaye.
Merca ta purbando di blokea China di adkiri e chipnan y tecnologia mas poderoso pa yuda su industria fabrica esakinan. Washington ta bisa cu por usa esakinan den arma y pa facilita vigilancia y abuso di derechonan humano na man di e Partido Comunista den gobierno.
Sin nombra Merca, Mao a bisa cu otro gobiernonan “deliberadamente a blokea y manca companianan Chines.” El a haci kehonan similar contra Washington dialuna. “Termento asina y practicanan hegemonico seriamente ta viola principionan di mercado y orden comercial interanacional,” Mao a bisa. El a apela na otro gobierno pa “tuma decisionnan independiente basa riba nan propio interesnan.”
Un persona familiar cu e acuerdo a bisa AP diadomingo cu Hapon y Hulanda a bay di acuerdo cu controlnan di Merca.
E partido Comunista a inverti biyones di dollar pa desaroya productornan di chip, pero ainda nan tin mester di ekipo di manufactura, materia prima y otro tecnologia.
Hulanda ta cas di ASML, e lider den tecnologia extremo-ultravioleta, EUV, cu ta permiti fabricantenan paketa mas circuito den un chip. Gobierno Hulandes a blokea e benta di mayoria di su ekipo avansa na China bao un acuerdo di seguridad cu ta inclui Washington.
