China a bisa cu exitosamente a lansa un ‘astronave reusabel experimental’ bou nivelnan eleva di secresia. Vigilantenan di industria espacial ta kere cu e ta un sorto di avion espacial sin tripulacion, similar na e X-37B opera pa Fosa Aereo y Forsa Espacial Mericano den añanna recien.
Un declaracion cortico di noticiero estatal di China, Xinhua, a anuncia e lansamento for di e Centro di Lansamento di Satelite Jiuquan den China nort occidental diabierna.
“Despues di un periodo di operacion den orbita, e astronave lo bolbe na e sitio programa pa aterisahe na China. E lo test tecnologianan reusabel durante su vuelo, proveyendo sosten tecnologico pa e uso pacifico di espacio”, e declaracion ta bisa.
A conduci e mision bou un velo di extra-secresia, sin publica potret oficial di lansamento ni e ora di e lansamento.
“Esey ta conduci na pensa cu esaki no ta djis un avion espacial, sino un avion espacial militar”, segun astronomo Jonathan McDowell, di Harvard-Smithsonian Center for Astrophysics a bisa durante un conferencia via Zoom, patrocina pa Agencia Espacial Europeo ayera.
Anteriormente China a anuncia su intencion pa test un avion espacial na 2017, y tin reportenan pafo di e pais pa varios luna caba cu tabatin preparacionnan andando.
E X-37B Mericano a haci vuelonan autonomo durando mas di dos aña. No ta cla con largo e astronave Chines nobo aki lo keda den orbita. Observador di satelite Michael Thompson a nota cu si e ta supone di ta un mision cortico, lo por bolbe Tera den menos di 24 ora.
