China a exigi ayera pa Washington retira sancion di exportacion imponi riba companianan Chines den e ronda mas recien di un conflicto empeorando tocante tecnologia, siguridad y derechonan humano.
Ministerio di Exterior a acusa administracion di Trump di interferi cu asuntonan di China door di agrega ocho compania acusa di tin rol den un accion contra musulman den su region nort occidental di Xinjuang na un blacklist di exportacion.
Washington tambe a impone control riba acceso na tecnologia Mericano pa 24 compania y entidadnan vincula na gobierno cu ta bisa por ta involucra den obtene bienes cu uso potencial militar.
E decision Mericano ‘a viola normanan basico di relacion internacional’ y a ‘daña interes Chines’, segun vocero di e ministerio, Zhao Lijian. “Nos ta urgi Merca pa coregi su erornan, revoca e decision relevante y stop di interferi den asuntonan interno di China”, Zhao a bisa.
E medidanan anuncia diabierna ta expande e campaña Mericano contra companianan Chines incluyendo e gigante tecnologico Huawei, cual Washington ta bisa por ta menasa pa siguridad nacional.
Beijing a critica limitenan imponi anteriormente riba Huawei Technologies Ltd. y otro compania incluyendo Hikvision Digital Technology Ltd., un proveedor di productonan di siguridad. Ainda mester bisa si lo tuma represalia.
Un compania cita diabierna den conexion cu Xinjiang ta acusa di ‘participa den violacion di derechonan humano’ segun Departamento di Comercio a bisa. E resto ta acusa di ‘permiti vigilancia di halto tecnologia di China’ den e region.
Un di e proveedornan di tecnologia, CloudWalk Technology Ltd., cu ta produci sistema di reconocemento di cara, a bisa den un declaracion cu ‘trato inhusto’ asina lo haci daño na companianan Mericano y desaroyo global.
Industrianan tecnologico Chines ta desaroyando nan propio chip procesador, software y otro producto. Pero nan tin mester di componente y tecnologia Mericano, Europeo y Hapones pa smartphone y otro aparatonan, como tambe pa procesonan di manufactura.
E compania acusa di violacion di derechonan humano, Aksu Textiles Co., a bisa den un declaracion cu e decision Mericano no ta regarda hechonan. E compania a bisa cu no lo ta afecta pasobra cualkier material Mericano por wordo reemplasa cu fuentenan Chines.
Otro companianan no a contesta na preguntanan con nan lo por ta afecta. E decision pa agrega e companianan na e Entity List di Departamento di Comercio ta limita nan acceso na componente y tecnologia Mericano, rekeriendo permiso di gobierno pa nan exportacion.
Oficialnan Mericano ta keha cu desaroyo tecnologico di Beijing ta basa sikiera en parti riba conocemento stranhero y por afecta liderazgo industrial Mericano of menasa siguridad di su bisiñanan.
Kehonan tocante ambicion tecnologico di Beijing a impulsa presidente Donald Trump pa aumenta duties riba importacion Chines na 2018, lansando un guera di tarifa cu ta afectando comercio global. E dos gobierno a firma un tregua na januari, pero Trump a menasa di cancela esaki si China no cumpra mas exportacion Mericano.
Otro companianan cita diabierna ta ‘representa un riesgo significante di procura sosten di articulonan pa uso final militar na China, segun Departamento di Comercio.
E nomber mas prominente riba e lista ta Qihoo 360, un proveedor mayor di software anti-virus y web browser. Riba su cuenta di red social, Qihoo 360 a acusa Departamento di Comercio di ‘politisa negoshi’ y investigacion y desaroyo comercial.
Companianan cu tabata obhetivo di sancion Mericano anterior, incluyendo Huawei, ta nenga cu nan ta un menasa. Oficialnan Chines ta acusa Washington di usa advertencia di siguridad falso pa blokea competidornan di industrianan tecnologico Mericano.
Otro compania riba blacklist, CloudMinds Technology Co., un fabricante di robot conecta na internet, a bisa cu tur su productonan ‘ta diseña pa uso civil’. A apela na gobierno Mericano riba su cuenta di red social pa ‘stop e trato inhusto aki’.
Comments are closed.