Gobierno di China dialuna a critica e sugerencia di presidente Donald Trump cu hackernan Chines, no Rusia, por ta tras di un campaña di spionahe cibernetico contra Merca.
Trump diasabra a rechasa comentarionan di Secretario di Estado, Mike Pompeo y otro oficialnan cu e Kremlin ta tras di intentonan pa spiona riba agencianan federal. Trump, sin ofrece ningun evidencia, a bisa cu ‘por ta’ China.
E ministerio di Exterior a bisa cu China ta contra spionahe cibernetico y a actua contra crimen cibernetico. “Merca a politisa e asunto di seguridad cibernetico sin evidencia conclusivo y continuamente ta plama informacion falso y tira santo riba China den un intento pa susha imagen di China”, un vocero di e ministerio, Wang Wenbin, a bisa. “Nos ta spera cu Merca lo asumi un actitud mas responsabel pa cu seguridad cibernetico”, el a agrega.
China ta considera ampliamente como, hunto cu Merca y Rusia, un di e gobiernonan mas avansa den desaroyo di capacidadnan di guera cibernetico.
Na juli ultimo, gobierno Mericano a acusa dos ciudadano Chines di ehecuta spionahe cibernetico a largo plaso desde 2009, cu meta di horta informacion tocante vacuna di coronavirus, arma, y actividadnan di derechonan humano.
Oficialnan militar Chines y otronan tambe a ser enhuicia desde 2014 na Merca, pa cargonan di ehecuta atakenan di hacking pa horta secretonan comercial.
