China a critica oposicion di Washington na tecnologia di telecomunicacion di proximo generacion Chines despues cu vice presidente, Mike Pence a pidi Iceland y otro gobierno pa busca alternativa.
Un vocero di ministerio di exterior, Geng Shuag, a acusa lidernan Mericano di ‘abusa e concepto di siguridad nacional’ pa blokia actividad comercial Chines.
Huawei Technologies Ltd. di China ta un lider den tegnologia 5G. Washington ta bisa cu Huawei ta un riesgo pa siguridad, un acusacion cu e compania ta nenga.
Huawei, e prome marca global di tecnologia di e pais, ta den centro di tension Mericano-Chines tocante competencia economico y tecnologico. E compania a acusa autoridadnan Mericano e siman aki lansa atake cibernetico pa kibra den su sistema di computer, y purba di forsa empleadonan di Huawei pa duna informacion.
Washington kier ‘traha cu Iceland y otro nacionnan amante di libertad pa haya alternativa pa e operacion 5G esencialmente estatal di China’, Pence a bisa den un reunion e siman aki cu prome minister di Iceland, Katrin Jakobsdottir.
Geng a keha cu lidernan Mericano a haci ‘comentarionan iresponsabel’ tocante ‘cooperacion normal di negoshi’ involucrando companianan Chines.
“Esaki ta un tipico hegemonismo y e politisacion di asuntonan economico y comercial”, Geng a bisa. “China ta firmemente opone na esaki.”
