(AP) – Reguladornan Chino a crea un plataforma cu ta permiti e publico reporta y comenta tocante e companianan di wega cu nan ta kere ta viola e restriccion di tempo permiti pa muchanan hunga online.

China su National Press and Publication Administration a crea e plataforma. E ta laga e personanan cu tin carchi di identificacion Chino pa reporta violacion di e reglanan anteriormente stipula pa e gobierno, entregando e keho cu evidencia di e violacion. Di e manera aki, nan por efectivamente duna e pueblo e poder di controla y reenforsa e polisa riba companianan manera Tencent y NetEase.

Esaki ta bini despues di China su decision di pone un limite di tempo riba muchanan menor di edad, bahando e cantidad di ora cu nan por pasa riba wega online na 3 ora pa siman, como un intento di combati adiccion na weganan online den muchanan. Companianan cu ta traha wega tin cu aplica e limite aki di un ora di wega online riba diabierna, diasabra y diadomingo entre 8pm te cu 9pm. Anteriormente e limite tabata di 90 minuut riba mayoria di e dianan.

Otro plataformanan online ta existi na China pa e keho di clientenan of e reporte di e actividadnan “ilegal y dañino” online. Pero e ta hopi poco comun pa crea un website solamente pa e restriccionnan specifico dentro di un industria.

Mayornan atrobe a acepta e limitenan nobo. Anteriormente e mayornan a elogia e restriccionnan cu tabata prohibi muchanan di hunga te oranan laat di anochi, y a limita e tempo cu tin mag di hunga wega online na 90 minuut den dia di siman.

Reguladornan ta bisa cu e companianan aki di wega ta responsabel pa e refuerso di e restriccionnan aki pa medio di sistema di registracion unda cu ta rekeri e nomber real di e persona, cual lo yuda e compania por implementa e limite den cantidad di ora cu mag di hunga pa e muchanan aki y e cantidad di placa cu nan mag di gasta of inverti den e weganan aki.

E reguladornan a haci un yamada na e companianan aki anteriormente den e luna aki, y a urgi nan pa tene hopi na cuenta e salud mental y fisico di e muchanan. Mirando cu tin varios caso unda cu e adiccion na weganan online hopi biaha ta causa dañonan cu por ta tanto mental como fisico, pero tambe den e parti educativo di muchanan, en principal muchanan menor di edad.

E companianan a keda ordena di limpia tur e contenido den nan weganan, y kita tur loke ta inclui “balornan eroneo” manera violencia.

Autoridadnan Chino ta buscando manera di combati influencianan cu por ta “danino” pa muchanan hoben, incluyendo weganan online y te hasta e cultura “irracional” di celebridadnan y nan fanatico.

E campaña ta parti di e preisdent Chino Xi Jinping su meta di “rehubenacion nacional” pa un nacion mas saludabel y poderoso. E campaña ta expande e influencia gubernamental na varios aspecto di bida, di e economia, a e tecnologia, cultura, educacion, religion y sociedad.