(AP) — China a aterisa un astronave riba Mars pa prome biaha diasabra, un logro tecnico dificil, mas dificil ainda cu aterisahe riba Luna, den e stap mas recien pa su metanan espacial ambicioso.
Segun plan, un rover lo keda den e lanter pa algun dia di test diagnostico prome cu lo lansa esaki pa explora un area di Mars conoci como Utopia Planitia. E lo join un rover Mericano cu a aterisa riba e planeta cora na februari.
E prome aterisahe di China na Mars ta yega despues di su lansamento luna pasa di e seccion principal di loke ta bay bira un stacion espacial permanente, y un mision cu a trece piedranan back for di Luna aña pasa.
“China a laga un footprint riba Mars pa prome biaha, un stap importante pa exploracion espacial di nos pais”, agencia noticiero oficial Xinhua News a bisa anunciando e aterisahe riba un di su cuentanan riba rednan social.
Merca tin nuebe aterisahe exitoso na Mars desde 1976. Union Sovietico a aterisa riba e planeta na 1971, pero e mision a faya despues cu e astronave a stop di transmiti informacion tiki despues di aterisa.
Un rover y un helicopter miniatura di e aterisahe Mericano na februari actualmente ta explorando Mars. NASA ta spera cu e rover lo colecta su prome muestra na juli pa trece back na Tera dentro di un decada.
China a aterisa riba Luna prome, pero aterisa riba Mars ta un esfuerso hopi mas dificil. Astronavenan ta usa escudo pa protege di e calor ora di drenta atmosfera Marsiano, y ta usa tanto retro-raket y parachute pa slow down suficiente pa preveni crash den aterisahe. E parachute y raket mester wordo lansa na momentonan preciso pa aterisa na e luga designa. Solamente mini-retro raket ta necesario pa un aterisahe Lunar, y parachute so ta suficiente pa bolbe Tera.
Xinhua a bisa cu e capsula di entrada a drenta atmosfera di Mars na un altitud di 125km, cuminsando loke a yama ‘e fase mas riesgoso di henter e mision’.
A lansa y despues jettison un parachute di 200m2, y despues a lansa un retro-raket pa slow e velocidad di e astronave na casi cero, Xinhua a reporta. E astronave a flota alrededor di 100m riba e superficie pa identifica cualkier obstaculo prome cu baha riba cuatro pia.
“Cada stap tabatin solamente un chens, y e accionnan tabata vincula di cerca. Si tabatin cualkier defecto, e aterisahe lo a faya”, segun Geng Yan, un oficial na e Administracion Espacial Nacional Chines, segun Xinhua.
E aterisahe a tuma luga pa 7:18am ora di Beijing, maske mas di un ora a pasa prome cu controladornan na Tera por a confirma cu e aterisahe tabata exitoso, segun Xinhua. E rover mester a habri su panelnan solar y su antena, y despues a dura mas cu 17 minuut pa su señalnan crusa e distancia entre Mars y Tera.
Presidente Chines, Xi Jinping, den un carta di felicitacion manda na e team di e mision, a referi na e aterisahe como ‘un stap importante den e biahe di exploracion interplanetario di nos pais, realisando e salto di Tera-Luna na e sistema planetario y laga e marca di e Chines riba Mars pa prome biaha… e Madre Patria y pueblo semper lo recorda bo hazañanan destaca!’
Administrador asocia di NASA, Thomas Zurbuchen a tweet su felicitacion, bisando: “Hunto cu comunidad cientifico global, mi ta anticipa e contribucionnan importante cu e mision aki lo haci na comprension cu humanidad tin di e Planeta Cora.”
Aterisahe di China riba Mars tabata un tendencia riba Weibo, un plataforma di red social lider na China, cu hende expresando emocion y orguyo.
E astronave Tianwen-1 ta orbitando Mars desde februari, tempo cu el a yega despues di un biahe di seis luna y mey for di Tera. Xinhua a describi e mision como e prome exploracion interplanetario di China.
E rover, nombra pa e dios Chines di candela, Zhurong, ta spera di wordo lansa pa 90 dia pa busca evidencia di bida. Alrededor di e tamaño di un auto, e tin un radar cu ta penetra suelo, un laser, y sensornan pa midi e atmosfera y esfera magnetico.
