Ministerio di Relacion Exterior di China ta acusa lider di congreso di Merca, Nancy Pelosi, di haci comentario iresponsabel tocante protesta na fabor di democracia na Hong Kong.
Vocero Geng Shuang a bisa cu Pelosi y otro legislado di Merca a bruha lo corecto y incorecto, pa involucranan mes cu kendenan a yama e separatistanan di Hong Kong. “Nos a insisti pa Merca stop di reforsa forsanan violento radical cu ta boga pa independencia di Hong Kong, y pa nan stop di intensifica palabra y accion cu ta daña e prosperidad y stabilidad di Hong Kong.”
Na Hong Kong, gobierno a anuncia cu lider di e ciudad, Carrie Lam y otro trahadonan ta celebra nan prome dialogo comunitario proximo siman cu 150 miembro di publico. E obhetivo ta pa invita persona pa expresa nan punto di bista na gobierno, pa compronde descontento den sociedad y busca solucion.
Lam a anuncia cu gobierno lo crea plataforma pa dialogo pa asina caba cu protesta exigiendo democracia, cu a sacudi Hong Kong sin cu ta mira un solucion na caminda. Pelosi, Presidente Democrata di Camara di Representante, a uni na legislado Republicano den un conferencia di prensa pa activista di democracia, incluyendo Joshua Wong.
Ta spera cu e Camara di Representante Mericano lo avansa legislacion cu lo rekeri un revision anual di status comercial y economico di Hong Kong su status, poniendo un chekeo potencial riba influencia di gobierno Chines.
Geng a bisa cu Hong Kong ta un problema interior di China, y China no ta acepta ningun interferencia den su asuntonan interno. “Nos ta insisti encarecidamente na Merca, pa respeta e soberania di China, pa nan stop di interferi den asunto di Hong Kong den cualkier forma y stop di promove revision di propuesta relevante relaciona cu Hong Kong.”
