(AP) — China a acusa Washington durante weekend di ataca companianan Chines inapropiadamente despues cu gigante di analisis genetico BGI Group y otro 17 compania a keda afecta cu limitenan riba acceso na tecnologia Mericano pa motibo di seguridad of derechonan humano.
Departamento di Comercio Mericano a bisa cu ta mira un peliger den e hecho cu dos unidad di BGI por contribui na aparato di vigilancia di gobierno Chines, cual gruponan di derecho humano ta bisa ta purbando di crea un base di dato di muestranan genetico cu a forsa musulmannan y otro minorianan pa duna.
A cita otro companianan pa nan rol den e modernisacion militar di Partido Comunista of desaroyo di arma di Iran y Pakistan y sospecha di abuso di derechonan humano na Myanmar.
Washington a acusa China di purba di usa companianan civil pa obtene tecnologia di chip procesador, aeroespacial y otronan cu por usa pa traha arma. Beijing ta bisa cu gobierno Mericano ta purbando di stop potencial competencia comercial.
Merca ta “fabricando excuus pa suprimi companianan Chines,” segun vocero di ministerio di Exterior, Mao Ning. El a haci un yamado pa Washington “bandona prehuicio ideologico” y “stop di abusa varios excuus pa suprimi empresanan Chines iracionalmente.”
