Despues di basha biyones den Venezuela den ultimo decada, China ta cortando prestamo nobo na e pais aki. Esaki ta un cambio di rumbo mayor den e relacionnan entre e dos nacionnan, expertonan ta bisa, segun informacion di Margaret Myers, un directora na e institucion Inter-American Dialogue, un grupo di investigacion estableci na Washington, ta bisa CNN.
Esaki ta bin na e pio momento tambe den e crisis economico y humanitario actual. “China no ta particularmente interesa den fia Venezuela mas placa”, e grupo di investigacion di Washington ta bisa, cu ta sigui trayecto di prestamo entre China y America Latina. Desde 2007 e banconan estatal di China a presta Venezuela $ 60 biyon, di acuerdo cu Inter-American Dialogue. Esey ta mas cu el a presta cualkier otro pais Latino Americano. Ta considera China e creditor mas importante di Venezuela. Di e suma ey, Venezuela ta debe China ainda aproximadamente $ 20 biyon, segun expertonan, y no tin ningun señal cu e pais por paga esaki na e momento di crisis aki.
Venezuela ta pagando mayoria di su debenan cu China cu cargamento di petroleo. Aña pasa PDVSA, Venezuela su empresa petrolero estatal, a manda como 579.000 bari di crudo pa dia pa China, di acuerdo cu e cuentanan anual di e compania.
Pero e aña aki Venezuela, cu ironicamente tin e reservanan mas grandi di mundo di petroleo, a mira produccion mengua te na e nivel mas abao di ultimo 13 aña. Algun di su proveedornan di servicio tecnologico specialisa, manera Schlumberger y Halliburton, a disminui nan operacionnan dramaticamente pa motibo di falta di pago di banda di Venezuela.
China fada
En bista di e mal maneho di gobierno di Venezuela cu a causa e crisis economico, ta parce cu e Chinesnan a fada. “E Chinesnan a permiti e Venezolanonan di haci cos estupido,” Derek Scissors, un cientifico permanente di American Enterprise Institute (AEI), cu ta sigui inversion Chines rond mundo, ta bisa. “E Chinesnan no kier permiti pa e Venezolanonan sigui haci cos estupido.”
Ministerio di Exterior di China no a responde na un peticion pa comentario. Ministerio di Financia di Venezuela tampoco kier a responde.
Mescos cu gobierno Chines, companianan di e pais aki tambe ta parce di ta perde interes den Venezuela. Desde 2010 companianan Chines a inverti $2.5 biyon di promedio pa aña den proyecto na Venezuela. Den e prome seis lunanan di e aña aki nan a inverti solamente $300 miyon, segun AEI.
Scissors ta enfatisa cu e datonan por cambia si China duna Venezuela sikiera un prestamo grandi mas, prome cu fin di aña. Pero e tambe ta di acuerdo cu China no ta den e humor pa sigui saca mas placa. E sentimento malo aki a hunga un papel aña pasa caba, ora e compania Chines China Railway Engineering Company a para construccion di un “bullet train” riba cual nan tabata traha na Venezuela. E sitionan di construccion, prome un signo di e relacionnan floreciente, awor ta bandona.
China pa basta tempo tabata mira Venezuela como un di su aliadonan principal den America Latina, segun expertonan. A cambio di placa cash y desaroyo di infrastructura, China tabata desea un fuente sigur di petroleo pa hopi aña. Pero China su ambicionnan a dal den e realidad di e crisis na Venezuela, unda ta anticipa cu inflacion ta dispara te 700% y economia ta proyecto pa reduci 8% e aña aki, segun IMF. Su moneda a cay den balor y hopi experto ta kere cu Venezuela por default riba su debe.
Cu entradanan disminuyendo, Venezuela no por paga tanto importacion di cuminda y medicamento, causando escasez grandi. Tin Venezolano cu por, ta biaha te Merca pa cumpra cos basico manera papel higienico y tuna.
“Den e caso specifico di Venezuela, ta berdad cu e Chinesnan no ta dispuesto di actua como e ‘lender of last resort’,” Mauro Roca, un economista Latino- Americano na Goldman Sachs, ta bisa. “E pais ta caba den un crisis profundo, pero cos por bira pio ainda.”
Fuente: CNNMoney, 30 september 2016, cu colaboracion di Serenitie Wang desde Beijing y Jethro Mullen desde Hong Kong.
