Serbia a elogia China pa yuda e forsanan militar di e nacion Balcanico cu drone y otro ekipo, en medio di preocupacion occidental cu e acumulacion di arma lo por menasa e paz fragil den e region.
Un declaracion di Ministerio di Defensa Serbio despues di un bishita di un delegacion di rango halto Chines, a gradici Beijing pa sosten economico y militar.
Oficialnan Serbio a bisa cu China a bay di acuerdo pa bende drone arma, haciendo e prome exportacion di aeronave cu piloto remoto Chines na un pais Europeo.
Minister di Defensa, Aleksandar Vulin a bisa cu ta spera cu e entrega den e lunanan binidero ‘lo reforsa grandemente e forsanan militar Serbio, cual lo gana capacidadnan cu no tabatin den pasado’.
Serbia tabata den guera cu su bisiñanan den añanan 1990s. E pais, cual formalmente ta buscando miembresia na Union Europeo, ya caba ta reforsando su forsanan arma cu avion di guera Ruso, tanki di bataya y otro ekipo.
China ta cada bes mas activo economica- y politicamente na Serbia y otro areanan di Europa sur oriental, como parti di su campaña global ‘Belt and Road’. E accion cerca of paden di teritorio di NATO a lanta preocupacion cerca paisnan occidental tocante influencia Chines creciendo rapidamente den e region.
Segun reportenan, Serbia a bay di acuerdo pa ricibi nuebe drone Chengdu Ptedodactyl-1, conoci na China como Wing Loong, cu un posibel orden futuro di 15 adicional. E dronenan di combate ta capaz di dal target cu bom y misil y por wordo uza pa operacionnan di reconocemento.
Tin miedo den West cu e armamento di Serbia y su aliadonan, Rusia y China, por curasha e pais Balcanico pa bay den otro guera, specialmente contra su antiguo provincia di Kosovo, cual a proclama independencia na 2008. Serbia, Rusia y China no ta reconoce estado di Kosovo, mientras Merca y mayoria di pais occidental si ta reconoce esaki.
