Un homber a herida ayera mainta 20 mucha, tres di nan ta den estado grave, na un scol na Beijing, prome cu por a detene e persona, autoridadnan local a declara.
E autor di e agresion a keda deteni na e luga di suceso, sin cu autoridadnan a duna mas detaye. Aunke algun medio tabata specula tocante uso di un cuchiu, e medio Global Times a afirma cu e homber tabata arma cu un martiu.
E atake a tuma luga 11:17or (ora local, 03:17 GMT), segun autoridadnan di e bario Xicheng, na parti oeste di e capital Chines. Tur e menornan herida a ser hiba hospitalnan di e capital, di cual tres ta den estado critico, segun e canal di television estatal CCTV.
E asalto a sucede, despues cu na fin di october un muhe a herida 14 mucha cu un cuchiu na un guarderia na municipio di Chongqing, den centro di China. Aunke e pais Asiatico ta trata di mantene semper un imagen di un pais sigur, e atakenan aki riba centro escolar ta bastante comun. Un di esunnan mas grave a tuma lugar na luna di april di e aña aki, ora un hoben di 28 aña a mata nuebe persona y a herida dies mas na un instituto den nort di e pais, presuntamente pa a sufri acoso escolar tempo cu e tabata studiante di e centro.
