BEIJING (AP) — China a revela un propuesta pa reglanan pa edicion genetico y otro tecnologia biomedico potencialmente riesgoso, despues cu un cientifico Chines a declara cu a crea baby geneticamente edita, sacudiendo e comunidad cientifico global.
Bou e medidanan proponi diamars, tecnologia involucrando edicion genetico, transferencia genetico, y regulacion genetico, lo wordo categorisa como ‘alto riesto’ y maneha pa e departamento di salud di e Conseho di Estado, e gabinete Chines.
E medidanan ta yega despues di declaracionnan na november di cientifico He Jiankui, bisando cu el a altera e DNA di rumannan muhe morocho naci e luna ey, uzando un herment poderoso. E tecnologia CRISPR-cas9 ta haci posibel pa opera riba DNA pa duna un gen cu falta, of deshabilita un cu ta causando problema.
E revelacion cu e por a wordo uza pa concebi muchanan a genera condena amplio tocante e implicacionnan etico di e procedura. Investigadonan a bisa cu e actonan di He ta expone e morochonan na riesgonan desconoci pa salud, posiblemente incluyendo un suceptibilidad mas halto pa malesa viral.
Edicion genetico pa proposito reproductivo ta prohibi efectivamente na Merca y mayor parti di Europa. Na China, guianan ministerial ta prohibi investigacion riba embryonan cu ta ‘viola principionan etico of moral’. Guianan etico publica na 2003 ta bisa cu edicion genetico ta permiti pa investigacion, pero cu e embryo experimental no por wordo cuida pa mas cu 14 dia.
He Jiankui a bisa cu el a edita e genes di e babynan na momento di concepcion, cu speransa pa haci nan resistente na e virus di AIDS, ya cu nan tata ta HIV positivo. Su lab tabata na Shenzhen, e hub tecnologico na sur di China, y el a recluta participantenan pa su estudio mediante un grupo di defensa pa pashentnan cu AIDS.
China inmediatamente a stop e experimentonan di He despues di su declaracion.
Hunto cu e nacemento di e morochonan, otro embryo cu no a nace ainda a resulta di e experimentonan di He, segun reportenan. Tur tres lo permanece bou observacion medico cu bishitanan regular supervisa pa departamentonan di salud di gobierno, segun Xinhua.
Aña pasa, ministerio di educacion di China a informa universidadnan rekeriendo auto- supervision riba investigacion relaciona cu edicion genetico. Den un email, e ministerio a bisa AP cu nan a pidi institucionnan educativo pa mehora maneho di etica den investigacion cientifico, y pa inspecciona investigacion relaciona cu tecnologia di edicion genetico.
Kehkooi Kee, un investigado di Universidad di Tsinghua cu ta edita genes den stem cells, a bisa cu e cantidad di formulario cu e mester yena awo a bira mas, pa motibo di mas control.
“He ta un cientifico iresponsabe”, Kee a bisa na december, despues cu ministerio di educacion a entrega su notificacion. “Mi no ni kier yam’e un cientifico – e ta un homber iresponsabel.”
Mientras e trabou di He a wordo critica ampliamente pa su coleganan na China, e tabatin repercusion pa otronan studiando edicion genetico. Tambe a haci mas dificil pa haya aprobacion pa investigacion den edicion genetico, Kee a bisa.
“E industria lo desaroya mas lentamente”, Kee a bisa. “Gobierno lo bira mas cauteloso cu fondonan pa investigacion, y organisacionnan priva, manera startups y caridad, lo ta menos probabel pa inverti.”
