E cantidad di persona infecta cu e virus nobo na China a bira tres biaha mas grandi cu e brote na ciudad Wuhan y otro ciudad grandi. Wuhan a raporta 136 caso nobo di e malesa respiratorio. E capital di Beijing a raporta dos caso y Shenzhen a confirma un.

E total di infeccion conoci awo ta mas di 200 y tres persona a fayece. E fuerte aumento di caso ta produci ora cu miyones di hende Chines ta prepara pa cuminsa nan biahe pa vakantie di aña nobo Lunar.

Trahado di salud a identifica e infeccion cu a aparece pa prome biaha na Wuhan na december como un forma di coronavirus. Nan ta bisa cu a provoca un brote di neumonia viral, pero ainda no ta conoce mucho di dje.

Aunke ta kere cu e brote a origina na un mercado, trahado y cientifico ainda mester determina exactamente con e ta propaga. Sur Korea a informa su prome caso di e virus, dos na Thailand y un na Hapon.

E brote ta rebiba memoria di virus SARS – tambe un coronavirus – cu a costa bida di 774 persona na cuminsamento di añanan 2000 na decenas di pais, principalmente na Asia. Analisis di e codigo genetico di e virus ta demostra cu e ta relaciona mas cercanamente na SARS cu cualkier otro coronavirus humano.

Autoridad na Wuhan, un ciudad di 11 miyon di habitante na centro di China, centro di e brote, a bisa dialuna cu durante weekend a confirma 136 caso, cu un tercer persona muriendo pa e virus.

Pa diadomingo anochi, autoridad a bisa cu tin 170 persona na Wuhan cu ainda ta ricibi tratamento na hospital, incluyendo 9 persona estado critico. Trahado di salud na districto Daxing di Beijing a bisa cu dos persona cu a biaha pa Wuhan a haya neumonia relaciona cu e virus.

Na Shenzhen, un importante centro tecnologico cerca di Hong Kong, autoridad a bisa cu un hende homber di 66 aña di edad a mustra sintoma di virus despues di a biaha bishita famia na Wuhan. Otro 8 persona ta den cuarentena y bou observacion pa determina si tin e virus.

Ta confirma cuatro caso den exterior, tur relaciona cu persona di Wuhan of cu a bishita e ciudad. Na Sur Korea, centro di control y prevencion di malesa di Korea a bisa cu un hende muhe di 35 aña di edad tin keintura y problema pa hala rosea despues di bay Wuhan. E ta den aislamento y tratamento den hospital local.

Organisacion Mundial di Salud a bisa cu actualmente no ta recomendando restriccion riba biahe of comercio, pero ta brinda orientacion pa pais ta prepara pa cualkier brote. Aeropuerto di Singapur, Hong Kong y Tokyo ta controla pasahero for di Wuhan. Autoridad di Merca a anuncia cu nan lo tuma medida similar na tres aeropuerto San Francisco, Los Angeles y New York.