Chilenonan atrobe a regresa riba caya na di seis dia di protestanan na e pais, cu a laga 18 persona fayeci, entre nan un menor di edad, debi cu e agenda social presenta pa e Presidente di Chile, Sebastián Piñera no a caba di convence nan.
Ta trata di un jornada nobo di manifestacion cu desde diabierna den oranan di anochi a cuminsa un explosion social sin precedente na e pais, tambe a produci incidentenan grave cu te e fecha a causa e morto di 18 persona.
Gran parti di e pais ta sigui den estado di emergencia bou control di Ehercito y cu toque de queda den oranan di anochi tur dia den varios bario y ciudad.
E funcion di Ehercito a keda hopi cuestiona den dianan aki, den cual via rednan social ta comparti videonan cu ta mustra presunto abuso cometi pa e funcionarionan.
Den e jornada aki, e expresion di miles di manifestante ta pacifico y festivo, principalmente te na e momentonan aki, leu di potretnan di enfrentamento cu forsa di orden manera a sosode fin di siman pasa.
Ciudadanonan na e Plasa Italia di Santiago y cayanan cercano, e caretera principal di Valparaiso, Waf di Iquique of Plasa di Arma di Curico, entre otronan ta e puntonan di concentracion di e manifestantenan.
E modelo privatisa di pension, e sistema precario di salud of e salarionan baho ta algun di e motibonan cu e haci cu e poblacion Chileno a sali riba caya pa exigi cambionan.
Diamars pasa, Piñera a bisa cu a tuma nota di e reclamonan, el a pidi pordon pa no ripara e malcontento y a anuncia un serie di medida pa aumenta e aporte estatal di e pension, disminui e costo di medicina of aumenta e salario minimo.
