(BBC) – Un Constitucion nobo si, pero esaki no. Esey tabata e mensahe cu Chile a duna diadomingo ultimo den un participacion historico di 13 miyon persona – e voto tabata obligatorio – opcion di rechaso a haya casi 62% di voto compara cu 38% di aproba.
E victoria di e “rechaso” ta mantene habri e cambio constitucional, cu a wordo presenta como un solucion pa resolve e tension di e crisis social di aña 2019, pero awor tin cu wak con e proceso ta bay sigui.
Despues di aproba e redaccion di un Constitucion nobo na 2020 y eligi e miembronan di e Convencion pa skirbie, e pais finalmente a dicidi a traves di un referendum obligatorio rechasa e proposicion.
Cu e victoria di e “rechaso”, e Constitucion di 1980, redacta durante dictadura di Augusto Pinochet (1973-1990) y tambe reforma di forma parcial den democracia, ta keda vigente.
E resultado di e Convencion, componi di manera igual pa hende muhe y hende homber, tabata un texto di 178 blachi, 388 articulo y 54 norma transitorio cu a keda rechasa ampliamente.
E Convencion cu a traha den un aña, a genera varios polemica y despues cu e texto a keda conoci e division na e pais a bira pio, unda cu na 2020 a vota cu un mayoria di 80% pa cambia e Constitucion di 1980.
E otro alternativanan presenta pa e cambio constitucional, e criticanan na e texto, specialmente riba autonomia di pueblonan indigena y e trabao di Convencion tabata algun di e motibonan cu ta splica e resultado di diadomingo ultimo, califica como “decisivo” pa presidente Gabriel Boric.
