E hosnan cu diahuebs pasa a asota e region di Bio Bio, na e sur di Chile, a causa daño na 1.170 vivienda y ainda tin sector sin coriente, autoridadnan local a informa ayera.
Concepcion, e capital regional, di e waf bisiña di Talcahuano y e ciudad di Los Angeles, tur cerca di 500 kilometer di Santiago, ta esunnan mas afecta pa e hosnan, un fenomeno natural casi desconoci na Chile.
Na Talcahuano tin 700 vivienda daña, otro 100 na Concepcion y 370 na Los Angeles, asina e intendente di Bio Bio, Sergio Giacamán a afirma na e webpage Emol ora el a termina un reunion cu e Comite di emergencia.
E funcionario a agrega cu e coriente a bolbe den un 90% di e zona afecta, aunke casi 4.500 cliente ta continua sin servicio, di e 1.500 cu ta coresponde pa Talcahuano.
Mientrastanto, ayera a entrega curpa di e unico persona morto pa via di e hos, Eddy Maldonado Adasme di 70 aña, cu a ser placha pa un container cu tabata usa como oficina na e empresa cu e tabata traha.
Riba e critica pa e retraso di e yegada di ayudo pa e personanan afecta, e intendente Giacaman a sigura cu “loke a sosode diahuebs pasa na Los Angeles, y despues diabierna na Concepcion y Talcahuano” ta fenomenonan “cu ta leu for di cualkier pronostico. Ningun hende tabata espera un evento di e caracteristicanan aki”, el a expresa.
“Loke a sosode tabata trata di un evento cu a afecta hopi hende y na e fondo loke ta dispone di dje ta loke a entrega di biaha, tambe nos manda cumpra”, e intendente di Bio Bio a bisa y a sigura cu no tabatin disponibel elementonan suficiente di ayudo pa responde na tur e damnificado.
