(AP) — Cinco aña despues cu Tempel Satanico di Merca a genera titularnan – y desata un ola di panico – ora a keda designa como un iglesia, un organisacion similar na Chile, un pais conservador unda mita di su poblacion di 18 miyon ta identifica como Catolico, ta pidiendo gobierno pa reconoce nan legalmente como un asociacion religioso.
Academico, creyente y residentenan consulta pa AP ta nota cu Chile, unda un tradicion duradero di Catolicismo a hunga un rol lider den discusionnan publico, ta experimentando un crisis di fe, despues di revelacionnan di cantidad di scandal di abuso sexual dentro di iglesia Catolico durante añas.
“E tipo di organisacionnan aki awo ta sinti cu nan tin mas sosten pa reta loke tabata virtualmente imposible antes,” segun Luis Bahamondes, profesor den Centro pa Estudio Hudaico na Universidad di Chile. Y esey ta pasobra “te cu hopi recientemente, Iglesia Catolico tabata disfruta di poder sin precedente. E tabatin un opinion riba tur cos: politica, economia, geopolitica, sexualidad y educacion.”
A pesar di su nomber, Tempel di Satanas: Satanista y Luciferiano di Chile no ta participa den sacrificio ni ta pidi congregantenan pa adora diabel. Entre su 100 miembro tin hende cu ta traha como publicista, bombero, polis, abogado y psicologo, kendenan a haya den e organisacion un manera pa desafia normanan moral, dogma y imposicionnan religioso.
Mientras nan ta acepta e termino Satanista, nan no ta adora ni kere den Satanas. Na lugar di esaki, nan ta adora racionalidad, individualismo, placer y bida mundano.
Na lugar di diosnan, nan ta elogia humanidad.
“Bo ta doño di bo presente y futuro, no tin Dios cu ta tuma decision pa bo,” segun Haborym, vocero di e grupo, durante un caminata door di graf y mausoleo na Santana General di Santiago. E ta nota cu e figura di Satanas ta puramente simbolico y cu nan ta haci nan ritualnan “pa saca emocion y laga e intelecto un banda.”
Haborym y otro miembronan di Tempel di Satanas na Chile a papia sin revela nan nomber real, particularmente cu hopi di nan tin trabao dunando cara na publico, citando menasa.
Pa por join e Tempel di Satanas na Chile, ta rekeri aplicantenan pa pasa den un proceso largo cu ta inclui yena un formulario, mustra prueba cu no tin un record criminal, pasa den un entrevista cu un comision special, y finalmente un evaluacion psicologico. Unabes nan ta acepta, miembronan por scoge un nomber nobo –normalmente di un demoño of angel cay – cu cual ta bay identifica nan dentro di e Tempel y entre e otro asociadonan.
Funda na 2021, Tempel di Satanas Chileno tin 100 miembro y mas cu 400 persona a aplica pa join den ultimo simannan, segun Haborym. Interes a peak fin di juli, ora e grupo formalmente a solicita ministerio di Husticia di e pais pa reconoc’e legalmente como un organisacion religioso.
Un tormenta den medionan di comunicacion a bin, desatando un debate fuerte y causando sensacion entre e denominacionnan religioso principal di Chile.
“Historia di Satanismo ta bon conoci (y) hopi biaha tabata causa di tragedia,” lidernan di varios iglesia na Chile, incluyendo Catolico, Anglicano, Hudiu y Evangelico, a bisa den un declaracion conhunto.
No ta cla si gobierno Chileno ta bay reconoce legalmente e Tempel di Satanas como un asociacion religioso legitimo, pero su mero existencia ya a yuda genera un discusion cu te recientemente tabata impensable den e sociedad conservador aki. Exigi reconocemento ta e expresion final di tur loke estetica Satanico ta elogia: rebelion contra status quo y kiebro cu tradicion.
