(EFE) – E asesinato di un agente policial siman pasa cerca di Santiago, na unda el a muri cu un tiro den su cabes, a rebiba e debate tocante e posesion di arma di candela na Chile, un tema polemico na Merca tambe despues di e ultimo tiroteonan cu a laga decenas di victima mortal.
E presidente Gabriel Boric, den su prome cuenta publico dia 1 di juni ultimo a anuncia cu lo busca e prohibicion total di armanan di candela den man di personanan civil, dianan despues cu na Texas, Merca, a tuma luga un tiroteo na un scol cu a laga 21 morto, e mayoria tabata muchanan.
Mientras e mundo ta yora e tragedia Mericano aki, e morto di dos agente pa herida di bala den menos di un luna a causa consternacion na Chile, simannan despues cu un periodista a ser asesina cu un tiro den su cabes mientras tabata cubri un manifestacion.
“Chile sin armanan ta un Chile mas sigur”, Boric a bisa, ora a presenta un programa di “tolerancia cero” na su uso di parti di civilnan.
For di e momento ey, varios alcalde oficialista a duna respaldo na su decision, mientras cu esun di ultra derecha y otro blokinan independiente ta lucha den e banda contrario.
Segun The Small Arms Survey -rapport di Instituto di Halto Estudio Internacional di Universidad di Ginebra (Suiza)-, na Chile tin alrededor di 2,22 miyones di arma di candela, loke ta supone 12 pa cada 100 habitante.
Expertonan ta coincidi cu aunke Chile no ta un pais specialmente arma, e debate a bin dilanti pa aumento di sensacion di insiguridad, un di e preocupacionnan central di e poblacion.
Segun datonan oficial, mientras cu na 2019 un 43% di homicidio a ser cometi cu arma di candela, na 2021 tabata di 51% y e cifra a subi na 60% den aña aki.
