(La Nacion) – Brigadistanan y expertonan internacional a cuminsa uni ayera dialuna na e trabaonan pa combati e candela forestal cu ta asota e zona centro-sur di Chile, cu te awor a laga por lo menos 26 morto y mas di 1.100 vivienda destrui.
Mientras centenares di damnificado na poblacionnan agricola a cuminsa lanta despues di perde tur cos. E candela ta sigui activo na varios parti unda a destrui 270.000 hectar y awor mas cu un alerta meteorologico nobo pa calor extremo na region di Ñuble y Maule.
E candela, cu a haya forsa diahuebs ultimo, a laga 26 fayecido, 1.260 herido y 3.000 persona sin cas, segun rapport publica ayera dialuna pa Servicio Nacional di Prevencion y Respuesta pa Desasternan (Senaprec).
Na e balans di e catastrofe ta uni 1.159 vivienda destrui pa candela, cu a afecta un superficie mas grandi cu Luxemburgo.
E magnitud di e siniestro a haci cu tambe a percibi e nubia di shinishi na Santiago.
“Den cinco dia nos a haya un superficie kima ekivalente na loke por a kima den dos aña di candela,” minister di Interior, Carolina Toha a bisa ayera dialuna, unda tambe a adverti cu e cifra por aumenta pa motibo cu ta trata di un evento den desaroyo.
“Nos ta gradici na Spaña y presidente Sanchez pa manda Unidad Militar di Emergencia, conforma pa 50 profesional cu ta bay apoya den trabaonan di e candela forestal.” El a skirbi riba Twitter.
Chile ta transcuri e zomer cu temperaturanan record cu incluso a surpasa 40 grado Celsius na zona di pre-cordillera.
Di su parti presidente Gabriel Boric ta mobilisa y ricibi ayudo internacional, te ayera tabatin 280 candela activo di e cual 69 ta wordo combati pa 5.600 bombero y brigadista, tanto di Corporacion Nacional Forestal (Conaf) como di companianan forestal.
