Diamars pasa, Ministerio di Salud di Chile a manda pa Congreso un proyecto di ley riba sigaria electronico cu ta impone e mesun regulacion di uzo y comercialisacion cu e tabaco tradicional tin actualmente.
E proyecto pa regula e dispositivo aki (vape/ vaping), cual su uzo a aumenta na Chile entre hendenan homber principalmente, ta prohibi e consumo pa menor di edad y su uzo na luganan publico, ta restringi e publicidad y ta obliga pa tin advertencia riba e daño cu ta causa pa e salud riba e paki.
“E dispositivo aki lo bay tin e mesun norma cu e sigaria tradicional. Nan lo bay tin e mesun trato”, Jaime Mañalich, Minister di Salud a señala den un conferencia di prensa.
E sigaria electronico ta permiti hala likido cu nicotina y sabor, y ta expone e consumidor na un cantidad menor di toxina cu e sigaria combustibel. Den hopi caso, ta uza pa substitui e consumo di tabaco tradicional.
Organisacion Mundial di Salud (OMS) a duna di conoce na Brasil dos luna pasa den un informe cu a sigura cu e vaporisador aki ta ‘dañino indudablemente’ y lo mester ta regula, pero ademas, a conseha di no uza esaki mas pa stop di huma, ya cu no ta existi prueba riba su efectividad.
“Nan si ta provoca dañonan pa salud, nan ta contene nikel, cromo y chumbo, y como pais nos tin cu actua pa regula e dispositivo aki”, Paula Daza, sub-secretario di Salud Publica di Chile a sigura.
Aunke e number di humado na rond di mundo ligeramente a disminui desde 2007, e ta sigui halto y ta alcansa como 1.400 miyon, e mayoria di nan ta homber.
