(Reuters) – E Chilenonan Javier Silva y Jaime Nazar, tatanan di dos mucha homber, tabata e prome personanan cu ayera diahuebs a celebra nan boda cu entrada na vigor di e ley cu ta permiti matrimonio entre personanan di e mesun sexo na e pais sur Americano.
Na december, Congreso a aproba e legislacion cu ta garantisa derechonan di reconocemento legal y di vinculo despues cu e presidente Sebastian Piñera a pidi un discusion di e proyecto.
“Ta e prome personanan cu a casa na Chile pa nos ta un honor, un orguyo, nos a logra! Ta algo cu nos no a yega di pensa cu por a pasa” Silva a bisa na periodistanan despues di e ceremonia civil.
E norma a modifica e Codigo Civil y otro partinan legal pa permiti e union y regula e derechonan y obligacionnan cu esunnan cu ta casa ta adkiri.
Aunke tin un tradicion conservador largo, Chile a bin avansando den ultimo añanan den e reconocemento di derechonan mayor.
“Pabien na Jaime y Javier pa ta e prome pareha cu a casa bou e ley di matrimonio igualitario nobo. Awor sigui avansando pa un Chile cu igualdad di derechonan y libertad pa tur persona”. E presidente recien eligi Gabriel Boric ken ta bay huramenta awe a skirbi riba Twitter.
E proyecto di matrimonio igualitario a drenta na 2017 cu impulso di e ex-presidente Michelle Bachelet pero a wordo treci dilanti aña pasa.
Na Chile for di 2015 ya caba ta existi un mecanismo cu ta habilita e parehanan, incluyendo esun di e mesun sexo, pa registra un Acuerdo di Union Civil (AUC) cu ta permiti algun beneficionan legal.
