(AP) — Fiscalnan na Chile a bisa den weekend cu nan tin plan pa solicita formalmente pa Venezuela extradita dos di su ciudadanonan pa bay huicio pa cargonan relaciona cu e secuestro y asesinato di un disidente Venezolano na Chile anteriormente e aña aki, un caso cu a pone presion riba e relacion entre e paisnan Sur Americano.
Fiscalnan a conclui cu e asesinato di e activista y ex-teniente militar a ser planea na Venezuela. Si proba esaki, e asesinato riba suelo Chileno por señala un frente nobo den e represion amplio di gobierno di presidente Nicolas Maduro contra oposicion prome cu su intento di reeleccion e aña aki.
Venezuela a rechasa cualkier participacion.
Fiscalnan Chileno diabierna a implica publicamente e organisacion criminal mas grandi di Venezuela, Tren de Aragua, den e crimen. Autoridadnan tambe a indica cu nan ta kere cu e culpablenan den e asesianto di Ronald Ojeda, 32 – kende a busca asilo na Chile despues di protesta administracion di Maduro – por tabata trahando den nomber di gobierno Venezolano.
Politicanan abierto di Ojeda, segun fiscalnan, a descarta speculacion cu e grupo a mat’e pa su participacion den actividad ilicito di gang di caya. Tren de Aragua nunca a haci un exigencia pa rescata di secuestro. A mata Ojeda apenas oras despues di su secuestro. “Nos ta papiando di un victima cu a participa den accion contra gobierno Venezolano,” segun Hector Barros, fiscal liderando e caso.
Aumentando e sospecha, Barros a bisa, a deshaci di curpa di Ojeda di un manera escalofriantemente metodico – algo inusual pa e Tren de Aragua. Dia 1 di maart, despues di 10 dia di buskeda, autoridadnan Chileno a haya su curpa den un maleta, dera bao di un edificio den suburbionan di Santiago, cu puiro di cal blanco basha pa agilisa descomposicion y cubri cu cement.
Polis Chileno a detene un Venezolano di 17 aña di edad, kende tabata na e pais ilegalmente, relaciona cu e caso. Exigiendo pa Venezuela coopera den e investigacion, gobierno Chileno a priminti di busca extradicion di e otro dos sospechoso cu a huy pa Venezuela. Unabes cu Venezuela haya e solicitud, e proceso lo move na cortenan Venezolano, cu lo determina si por extradita e sospechosonan prome cu e hudiciario por haci e determinacion final.
Toch Venezuela te awo a faya di coopera cu solicitudnan di extradicion di Chile den pasado, den otro casonan criminal. “Wowo di mundo ta bay ta observando con (Venezuela) ta actua,” minister di Interior, Carolina Toha a bisa reporteronan diabierna. “Nos ta bay sigura esaki.” El a bisa cu Chile ta considera e crimen “cu e mayor gravedad.”
Ojeda, ex-militar Venezolano, a huy di detencion Venezolano na 2017 y a busca refugio na Chile, cu a dun’e asilo aña pasa. For di exilio el a continua expresando oposicion contra Maduro riba rednan social te cu su desaparicion.
Imagennan di camara di seguridad for di mainta trempan dia 21 di februari, fecha di secuestro di Ojeda, ta mustra tres homber bisti como polis Chileno hibando e for di su apartamento y hincando e den un vehiculo.
E incidente a trece e relacionnan ya caba tenso entre Chile y Venezuela na un punto di inflexion.
Santiago a retira su embahador na Caracas diahuebs pa motibo di secuestro di Ojeda. Yamado a aumenta pa gobierno kibra relacion cu Venezuela despues cu su minister di Exterior, Yvan Gill, a rechasa e gang Tren de Aragua y su alcance na Latino America como un “ficcion crea pa medionan internacional.”
E caso ta yega na un momento sensitivo pa Maduro, kende ta postula pa reeleccion na juli. Den lunanan recien, su campaña largo pa caba cu disidencia a genera critica amplio y a pone presion riba esfuersonan di administracion di presidente Mericano, Joe Biden pa habri caminda pa eleccion liber y husto na e pais.
