Seis persona, esta e piloto y cinco pasahero, a muri diamars pasa despues di e caida di un avioneta comercial riba un cas, cu a resulta kima completamente na e sur di Chile, e autoridadnan a confirma.
“Nos ta papiando di seis persona fayecido”, e intendente di e ciudad di Puerto Montt, Harry Jüguensen a bisa di e caida di e aparato, cu a sucede poco despues di su salida for di e aerodromo di La Paloma, cu destino pa e localidad di Ayacara.
Jüguensen a detaya cu e victimanan ta cuater homber, cu piloto inclui y dos muhe, tur mayor di edad y tripulante di e nave.
E gobernante a aclara cu ‘felizmente’ e cas riba e cual e nave a dal no tabatin ni un hende aden, y a señala cu e cas ‘a kima completamente, e avion a explota, tabatin carga completo di combustibel’.
“E curpanan tabata na bista di e hende y completamente kima. E situacion ta hopi tristo”, e intendente a bisa, ken tambe a agrega cu ‘ta hopi probabel’ cu e victimanan ta trahado cu tabata dirigi pa e zona di Ayacara, ya cu ta posibel cu e avioneta di e siniestro ta forma parti di e ‘linea comercial chikito cu normalmente ta funciona bayendo e provincianan extremo. Nos no sa si nan ta trahado, pero ta hopi probabel cu esey ta e caso”.
