Oficina di Halto Comisionado di ONU pa derechonan humano Michelle Bachelet ayera a denuncia un ‘cantidad halto di violacion di derechonan humano’ na man di polis den e protestanan na Chile, ora el a presenta un informe riba e situacion na e pais Sur Americano.
“E violacionnan aki ta inclui e uzo excesivo y innecesario di forsa cu a ocasiona varios morto ilicito y personanan herida, tortura y mal trato, violencia sexual y detencion arbitrario”, a afirma den un comunicado di prensa di Oficina di Derechonan Humano di ONU, cu tabata na Chile tres siman di november pa investiga e situacion na shete region di Chile.
Human Rights Watch a reporta cu e cantidad di morto den e marco di protestanan a aumenta pa 26. E oficina ta sigura cu a documenta ‘cuatro caso di privacion arbitrario di bida y morto ilicito cu ta involucra agentenan di estado’.
Ora nan ta specifica e violencia di Carabinero, e informe a describi un cantidad grandi di violacion di derechonan humano. Entre nan ta e uzo no debido y indiscrimina di arma no letal pa dispersa e marcha pacifico durante e enfrentamento; e no distincion entre manifestante violento y esunnan cu tabata protesta pacificamente, y e cantidad ‘halto alarmante’ di hende cu lesion den nan wowo y cara, algo cu ‘ta duna cuenta di e violacion grave aki’. “Ta preocupa den particular e uzo di perdigon cu tin chumbo de dje”, e informe a splica den su conclusion.
E siman aki, presidente Chileno, Sebastián Piñera a reconoce e existencia di ‘atropeyo di derechonan humano’ durante e protestanan y anuncia un serie di reparacion pa e victimanan.
